იუსტიციის ყოფილმა მინისტრმა და ქართული ოცნების სიის მეოთხე წევრმა, თეა წულუკიანმა განაცხადა, რომ სირცხვილის დერეფნების ტიპის "სკანდალები" ოპოზიციისგან მისთვის ყოველდღიურობის ნაწილია და არ აკვირვებს.

"ხალხმა თქვა, რომ ოცნება არის პირველ ადგილზე გასული პარტია. ხალხმა თქვა, რომ ოცნებას აქვს 40 პროცენტზე ბევრად მეტი, ანუ საკმარისი ხმები მთავრობის შესადგენად, ამიტომ ის ილუზია, რომ ბრუნდებიან ხელისუფლებაში, დარჩა ილუზიად. ის ილუზია, რომ კოალიციური მთავრობა იქნებაო, დარჩა ილუზიად. რა თქმა უნდა, ისინი მეორე ტურზეც იქნებიან გამწარებული და მოაწყობენ ამ ტიპის ცუდ-უბრალო სკანდალებს კონკრეტულ პირებთან მიმართებით",— განაცხადა თეა წულუკიანმა.

წულუკიანის თქმით, მთავარია, ოპოზიციამ დააკონკრეტა, რომ სირცხვილის დერეფანს არა არჩევნებზე მისულ ხალხს, არამედ კონკრეტულ პირებს მოუწყობდნენ.

15 ნოემბერს ბათუმში გამართულ საპროტესტო აქციაზე ნაციონალური მოძრაობის წევრმა, ლევან ვარშალომიძემ მხარდამჭერებს მოუწოდა, რომ 21 ნოემბერს საარჩევნო უბნებთან სირცხვილის დერეფნები გააკეთონ. მისი ეს პოზიცია გააკრიტიკეს პარტიის ლიდერებმა, ხატია დეკანოიძემ და სალომე სამადაშვილმა. ამ იდეას არ იზიარებენ არც ოპოზიციურ ერთობაში შემავალი სხვა პარტიები.