პარლამენტის დეპუტატის ნიკა მელიას თქმით, ენმ-ის ლიდერთა ნაწილმა ცესკოს მიმართა, რომ საპარლამენტო სიიდან პარტიის რამდენიმე წევრი ამოიღოს:

"პარტიის მმართველობაში არსებულმა მცირე ჯგუფმა მიიღო გადაწყვეტილება, რომ რამდენიმე ძალიან აქტიური წევრი ნაციონალური მოძრაობისა სამაგალითოდ დაესაჯა და მიმართა ცესკოს მოთხოვნით, რათა ეს რამდენიმე ენმ-ის წევრი და ამავე დროს პოლიტსაბჭოს წევრი ამოღებულ იქნას ენმ-ის საპარლამენტო სიიდან."

მელიას განცხადებას გამოეხმაურა საქართველოს ექს-პრეზიდენტი უკრაინიდან. სააკაშვილის შეფასებით, "ამ ერთ მუჭა ადამიანებს არ აქვთ მხარდაჭერა" და ენმ ამ პროცესების დასრულების შემდეგ გაძლიერებული და ერთიანი გამოვა:

"ივანიშვილის მთავარი მიზანია ჩემი ჩამოშორება ქართული პოლიტიკიდან. სამწუხაროა, რომ ეს კეთდება ჩვენი ყოფილი თანამოაზრეების მცირე ჯგუფის ხელით, დაჩქარებულად 20 იანვრის ყრილობის წინ, რომელიც დაადასტურებს პარტიის ერთიანობას და იმას, რომ ამ ერთ მუჭა ადამიანებს არ აქვთ მხარდაჭერა. მე არც მიზნების დამთხვევა მგონია შემთხვევითი და არც ამორალური და ძალიან უსამართლო განაცხადის შეტანის დღის შერჩევა. მას შემდეგ, რაც ვერ მოხერხდა ჩემი პარტიიდან დისტანცირება, ხოლო პარტიის ხელში ჩაგდების გეგმა ჩავარდა, საქმე გვაქვს პარტიისთვის ზიანის მიყენების აშკარა მცდელობასთან. ნაციონალური მოძრაობა გამოვა ამ ყველაფრიდან გაძლიერებული და ერთიანი, როგორც არასდროს." - წერს სააკაშვილი ფეისბუკზე.