ნაციონალური მოძრაობის ერთ-ერთი ლიდერი, ნიკა მელია პარტიაში არსებულ განხეთქილებაზე და ყრილობის მოსამზადებელი სამუშაოების შესახებ განცხადებას ავრცელებს. 5 იანვარს გამართულ ბრიფინგზე მელიამ განაცხადა, რომ 7000 დელეგატიან ყრილობას, რომელიც 20 იანვარს გაიმართება, წევრებისა და მხარდამჭერების აბსოლუტური უმრავლესობის მხარდაჭერა აქვს, პარტიაში მყოფი მცირე ჯგუფი კი ამ ყველაფერს უპირისპირდება.

მისივე თქმით, ყრილობის მოწინააღმდეგე რამდენიმე წევრი ცდილობს, შეინარჩუნონ პოზიციები, გავლენა და ინტერესი პარტიაში:

"დასანანია, რომ პარტიის მმართველობაში მყოფი მცირე ჯგუფი ცდილობს, რომ შეინარჩუნოს პოზიცია, გავლენა და ინტერესი. ამ ყველა მიზნით, ისინი ცდილობენ წარმოადგინონ ყრილობა, როგორც არალეგიტიმური. ძალიან სამწუხაროა რომ პარტიის ეს ერთი ჯგუფი აცდენილია იმ განწყობებს, რომელიც აბსოლუტურ უმრავლესობაში არსებობს. ისინი ცდილობენ ყრილობის საბოტაჟი მოახდინონ, რაც რა თქმა უნდა თავშივე განწირულია".

მელიას თქმით, ყველაფერი 30 ნოემბერს, პოლიტიკური საბჭოს სხდომაზე, ორ ჯგუფს შორის უთანხმოებით დაიწყო:

"ერთი ჯგუფი ემხრობოდა, რომ ყრილობა ჩატარებულიყო 7 ათასი დელეგატის მონაწილეობით და მეორე ჯგუფს სურდა ყრილობა 2 000 დელეგატის მონაწილეობით გამართულიყო. გაიმარჯვა ჯგუფმა, რომელიც ლობირებდა 7 ათასი დელეგატის წინადადებას. ამ ყველაფერის შემდეგ დაიწყო 2000 დელეგატიანი ყრილობის მომხრე ჯგუფმა თავდასხმა".