თავდაცვის სამინისტროს განცხადებით, იმ მოქალაქეებს, რომლებსაც 2009 წლიდან სამხედრო ჰოსპიტალის მიმართ ხანდაზმული დავალიანება, სამი წელი და მეტი ვადით, ერიცხებათ, ჩამოეწერებათ. უწყების ცნობით, საუბარია 1 მლნ 600 ათასი ლარის თანხაზე.

"სამხედრო ჰოსპიტალი უფასო სამედიცინო მომსახურებას სამხედრო მოსამსახურეებს უწევს, ხოლო მოქალაქეებს ჰოსპიტალი დაფუძნების დღიდან ფასიან სამედიცინო სერვისს სთავაზობს. ჰოსპიტალი თანამედროვე აპარატურითაა აღჭურვილი და მომსახურების მაღალი ხარისხი გააჩნია. შესაბამისად, მოქალაქეები ჰოსპიტალს სამედიცინო მომსახურებისთვის ხშირად მიმართავენ. ცხადია, აღნიშნული მომსახურება გარკვეულ ფინანსურ უზრუნველყოფას მოითხოვს და ჰოსპიტალი შემოსავლებს პაციენტებისაგან იღებს", — აცხადებენ უწყებაში.

მათივე ინფორმაციით, მოქალაქეების რაოდენობა, რომლებსაც დავალიანება ერიცხებათ, 1 000-მდე ადამიანს შეადგენს.