იუსტიციის მინისტრი 18 აგვისტოს მიხეილ სააკაშვილის მიერ შეურაცხმყოფელი ტერმინით მოხსენიებაზე, ამბობს, რომ ის თავს მსხვერპლად არ მიიჩნევს. მისივე თქმით, სიძულვილის ენა პოლიტიკური კამპანიის ნაწილი არ უნდა იყოს.

"მე რადგან ვიყავი ამ დღეებში ამგვარი ტიპის გამოხტომების საგანი, ვიტყოდი, რომ მსხვერპლად თავს არ მივიჩნევ. მე ამ კონკრეტულ სუბიექტზე, რომელიც კიევში დაბუდებულა, რა თქმა უნდა, კომენტარს არ გავაკეთებ. ჩვენ ვაგრძელებთ ბრძოლას გამარჯვებისთვის და 31 ოქტომბერს ქართული ოცნება ძალიან დიდ გამარჯვებას ხალხთან ერთად აჩვენებს სწორედ ამ რეტროგრადულ და აგრესიულ ძალას, რომელიც უცხოეთიდან ებრძვის ამ ქვეყანას", — ამბობს წულუკიანი.

საქართველოს ექსპრეზიდენტმა, მიხეილ სააკაშვილმა იუსტიციის მინისტრი თეა წულუკიანი შეურაცხმყოფელად 18 აგვისტოს მოიხსენია. ოფიციალურ ფეისბუქგვერდზე სააკაშვილმა გააზიარა წულუკიანის ციტატა მის შესახებ — "სააკაშვილს აქვს შიში, რომ ჰააგაში დავას წააგებს" — რომელსაც ზედ დააწერა: "ეს მახინჯი საქართველოს გამტყუნებაზე ოცნებობს და ჩალიჩობს".