ფრაქცია ქართული ოცნების თავმჯდომარის, რატი იონათამიშვილის განცხადებით, ოქრუაშვილის "აღიარებამ" წერტილი დაუსვა დისკუსიას, ვის რა მიზანი ჰქონდა 20 ივნისის ღამეს.

"ეს იყო სკანდალური აღიარება, ფაქტობრივად ოქურაშვილის განცხადებამ წერტილი დაუსვა დისკუსიას, თუ ვის რა მიზანი გააჩნდა, 20 ივნისის ღამეს, ფაქტობრივად ეს იყო უფრო მძიმე აღიარება, ვიდრე სხვა ლიდერების, რომლებიც პირდაპირ ამბობდნენ, რომ მათი მიზანი პარლამენტში შეჭრა იყო", — თქვა რატი იონათამიშვილმა.

გუშინ, 19 მაისს, გადაცემა 360 გრადუსში, ოპოზიციის ერთ-ერთმა ლიდერმა, ირაკლი ოქრუაშვილმა თქვა, რომ გავრილოვის ღამეს ხელისუფლება "თავს გავიდა" და მათ სურდათ მთავრობისთვის თავისი ადგილი შეეხსენებინათ.

"როდესაც ხელისუფლება თავს გადის და ამ შემთხვევაში გავრილოვის ღამეს ეს მოხდა, და ეს არაა მხოლოდ ჩემი შეფასება, ამას ამბობს ძალიან ბევრი ადამიანი, მერე ადამიანებს, ვისაც გარკვეული ვალდებულება, პასუხისმგებლობაც, მოტივაციაც გააჩნიათ ხელისუფლებას თავისი ადგილი და პასუხისმგებლობა შეახსენონ, ხვდებიან ხოლმე ამ საფრთხის წინაშე, რომ აღმოჩნდნენ დაპატიმრებულები", — თქვა ირაკლი ოქრუაშვილმა.

ოქრუაშვილმა აღნიშნა, რომ ფიზიკურად ის ადგილზე მარტო არ იყო და ოპოზიციის ლიდერები ერთმანეთთან ახლოს იდგნენ, თუმცა ივანიშვილს მის მიმართ განსაკუთრებული გაღიზიანება ჰქონდა.