კაფე გალერის შენობის ერთ-ერთ ფანჯარაზე გადმოფენილი ლგბტ დროშა პოლიციამ ადმინისტრაციას ჩამოახსნევინა. TV პირველის კადრებში ჩანს, როგორ შედიან შსს-ს წარმომადგენლები შენობაში, შემდეგ კი ფანჯრიდან დროშა იხსნება.

პოლიციის წარმომადგენელი ადასტურებს, რომ "გარემოება აუხსნეს", ამის მიზეზად კი ასახელებს:

"იმიტომ, რომ რამე დაპირისპირებული მხარე არ მოვიდეს და ექსცესები თავიდან ავიცილოთ".

ჟურნალისტის კითხვას, იყო თუ არა ამის საფრთხე, ის დადებითად პასუხობს. შემხვედრ კითხვაზე, რომ დროშის ფანჯარაზე დამაგრება ამ ადამიანის გამოხატვის ფორმა იყო, პოლიციელი ამბობს:

"გამოხატეს მერე, არავის არ აუკრძალავს, თავისი ნებით ჩამოხსნეს. ავუხსენით გარემოება, სიტუაცია და ჩამოხსნეს ჩვეულებრივად", — თქვა მან.

დღეს 17 მაისია, ჰომოფობიასთან, ტრანსფობიასა და ბიფობიასთან ბრძოლის საერთაშორისო დღე. ამ დღეს საქართველოს საპატრიარქო "ოჯახის სიწმინდის" დაცვის დღეს აღნიშნავს. ილია მეორემ ეს "დღესასწაული" მას შემდეგ დააწესა, რაც 2013 წლის 17 მაისს მრევლმა და სასულიერო პირებმა მშვიდობიანი მოქალაქეები ძალადობრივად დაარბიეს.