2019 წლის 21 მაისს კანის კინოფესტივალზე სამხრეთ კორეელი რეჟისორის, ბონგ ჯუნ ჰოს ფილმის Parasite პრემიერა შედგა. სწორედ იმ დღიდან ამ კინოსურათის დაუჯერებელი წარმატებებით სავსე თავგადასავალი დაიწყო, კინოსამყაროში კი მნიშვნელოვანი ცვლილებების მოწმე გავხდით.

სწორედ ამ საიუბილეო თარიღის აღსანიშნავად ფილმის დისტრიბუტორმა კომპანია Neon-მა ხუთწუთიანი ვიდეო გამოაქვეყნა, სადაც ბოლო ერთი წლის განმავლობაში პარაზიტის მიღწეული ყველა მნიშვნელოვანი წარმატება და ამ კინოსურათით აღფრთოვანებული მსოფლიოს ემოციებია თავმოყრილი.

"თუ სუბტიტრების ერთინჩიან ბარიერს გადალახავთ, მაშინ უამრავ კიდევ უფრო საოცარ ფილმს აღმოაჩენთ", — ამბობს ამ ვიდეოს ერთ-ერთ ნაწყვეტში ბონგ ჯუნ ჰო და მან მართლაც შეძლო, რომ დასავლური პუბლიკა არაინგლისურენოვანი კინოთი უფრო მეტად დაეინტერესებინა.

პარაზიტის მსოფლიო პრემიერა კანის კინოფესტივალზე შედგა და პირველი აღიარებაც იქ მოიპოვა: ის წლის საუკეთესო ფილმად დასახელდა და პირველ სამხრეთ კორეული კინოსურათი გახდა, რომელსაც ოქროს პალმის რტო გადაეცა.

კიდევ არაერთი წარმატების შემდეგ კი ფილმის ოდისეა ორი ისტორიული გამარჯვებით დაგვირგვინდა: პარაზიტი ჯერ ოქროს გლობუსზე დასახელდა საუკეთესო უცხოენოვან ფილმად, შემდეგ კი ოსკარების დაჯილდოებაზე ოთხ ნომინაციაში გაიმარჯვა, მათ შორის წლის საუკეთესო ფილმის კატეგორიაში და ამით პირველი არაინგლისურენოვანი ფილმი გახდა, რომელმაც ეს ჯილდო მიიღო.

კინომოყვარულებისა და კრიტიკოსების აღიარებასთან ერთად ფილმი საოცრად წარმატებული აღმოჩნდა კინოგაქირავებაშიც: მსოფლიო შემოსავლებმა $266.9 მილიონი შეადგინა.

როგორც უკვე ვიცით, პარაზიტის ისტორია ამით არ სრულდება და ბონგ ჯუნ ჰო გეგმავს, რომ HBO-სთვის ფილმის მიხედვით ექვსეპიზოდიანი სერიალი გადაიღოს.