თბილისში ქალაქგეგმარებითი დოკუმენტების მომზადების პროცესი გამარტივდება. ამის შესახებ თბილისის მერმა, კახა კალაძემ დღეს დედაქალაქის მთავრობის სხდომაზე განაცხადა.

მისივე თქმით, მერიაში მზადდება სამართლებრივი ცვლილებები, რომლის მიხედვითაც, სამშენებლო-დეველოპერული კომპანიების წარმომადგენლებისთვის გეგმარებითი დავალებებისა და განაშენიანების რეგულირების გეგმების მომზადების პროცესში წარმოსადგენი დოკუმენტები მნიშვნელოვნად შემცირდება.

როგორც კალაძე ამბობს, აღნიშნული გადაწყვეტილების მიზანია, სამშენებლო სექტორში ჩართულ ადამიანებსა და დეველოპერებს ჰქონდეთ შესაძლებლობა, რომ მათი პროექტების დამტკიცება დროულად მოხდეს.

"ზოგადად, განაშენიანების რეგულირების გეგმა ბევრი მნიშვნელოვანი კომპონენტისგან შედგება. იქ არის ისეთი საკითხები, რომელიც შეიძლება, არ იყოს აუცილებელი და მათი განხორციელება სხვანაირად იყოს შესაძლებელი. ვიცი, რომ საკანონმდებლო პაკეტი მთელი რიგი ცვლილებებისა მომზადებულია ამ მიმართულებით იმისთვის, რომ ჩვენს მშენებლებს, დეველოპერებს გავუმარტივოთ მუშაობა, მითუმეტეს, ამ რთულ ვითარებაში. ზოგადად, სამშენებლო სექტორი ერთ-ერთი მნიშვნელოვანი კომპონენტია ეკონომიკის განვითარებისა და მოქალაქეთა დასაქმების თვალსაზრისით. შესაბამისად, ამ მიმართულებით მხარდაჭერა ძალიან მნიშვნელოვანია", — განაცხადა კახა კალაძემ.

როგორც კალაძემ აღნიშნა, ეს პროცესი სწორი ურბანული განვითარების ხარჯზე არ უნდა მოხდეს.