ნაციონალური მოძრაობის წევრი ნიკა მელია აცხადებს, რომ ახალი მოწვევის პარლამენტის სხდომებზე, მათ შორის საკომიტეტოზე, პარტია აქტიურად მიიღებს მონაწილეობას და ოპონირებას გაუწევს უმრავლესობას:

"ქართულ ოცნებას დაუფარავი გეგმა აქვს და მათ ერთი სული აქვთ როდის გადაიტანენ საკანონმდებლო ორგანოს თბილისში. მაშინ, როდესაც საქმე გვაქვს მცდელობასთან, რომ პარლამენტი გადაიტანონ ქუთაისიდან თბილისში, საუბარი იმაზე, მიიღებს თუ არა ნაციონალური მოძრაობა კომიტეტის სხდომებზე მონაწილეობას თბილისში, არის მეათეხარისხოვანი. ჩვენ გავაგრძელებთ მუშაობას. მიმაჩნია რომ ქუთაისი იქნება, თბილისი თუ სხვადასხვა შენობები, ყველგან მივიღებთ მონაწილეობას".

2014 წელს, მას შემდეგ, რაც მერვე მოწვევის პარლამენტის ნაწილმა (კომიტეტებმა) თბილისში, საკანონმდებლო ორგანოს ძველ შენობაში დაიწყო მუშაობა, ნაციონალური მოძრაობა თბილისში გამართულ სამუშაო პროცესში არ მონაწილეობდა. მათი თქმით, პარლამენტის ადგილად კონსტიტუციით ქუთაისია განსაზღვრული და სწორედ ისინი პროტესტს უცხადებდნენ მერვე მოწვევის საპარლამენტო უმრავლესობის გადაწყვეტილებას.