ერთი შეხედვით, ოქტომბრამდე, როცა The Mandalorian-ის მეორე სეზონის პრემიერა უნდა შედგეს, ჯერ კიდევ დიდი დროა დარჩენილი, თუმცა, როგორც უცხოურ მედიაში ვრცელდება ინფორმაცია, დისნეი უკვე ამ სერიალის მესამე სეზონზე მუშაობს.

Variety-ის ცნობით, ამ ცნობილი სატელევიზიო შოუს შემქმნელი ჯონ ფავრო უკვე აქტიურად მუშაობს მესამე სეზონის სცენარზე.

ეს სერიალი იმ იღბლიან პროექტებს შორის აღმოჩნდა, რომელზე მუშაობაც ჯერ კიდევ მარტში დაასრულეს და აშშ-ში კორონავირუსის გავრცელების გამო მკაცრ შეზღუდვებს მის წარმოებაზე მნიშვნელოვანი გავლენა არ ჰქონია. შესაბამისად, ერთგული მაყურებლები მის პრემიერას, დიდი ალბათობით, სწორედ დაგეგმილ დროს იხილავენ.

ჯონ ფავრომ ჯერ კიდევ გასულ წელს დაადასტურა, რომ მეორე სეზონში მანდოსა და პატარა იოდას ისტორიის გაგრძელებას ვიხილავდით. ასევე ცნობილია, რომ სერიალის სამსახიობო გუნდს შეუერთდა მსახიობი როზარიო დოუსონი, რომელსაც ასოკა ტანოს როლში ვიხილავთ.

სანამ ვარსკვლავური ომების გულმხურვალე ფანები ამ შოუს გაგრძელებას ელოდებიან, მანამდე კიდევ ერთი სასიხარულო ამბავი გავრცელდა: Disney Plus-ზე ამ სამყაროს შესახებ კიდევ ერთ დამოუკიდებელ სერიალს ვიხილავთ, რომელიც Rogue One: A Star Wars Story-ის სპინოფი იქნება და მასში სტელან სკარსგარდი მიიღებს მონაწილეობას.