პარლამენტის საპროცედურო საკითხთა კომიტეტის თავმჯდომარემ გიორგი კახიანმა გადაცემა 2030-ში სტუმრობისას განაცხადა, რომ ქართულ ოცნებას სურს კონსტიტუციაში ნებისმიერი ცვლილების განხორციელება ფართო კონსენსუსის საფუძველზე შედგეს:

"ჩვენ გვინდა, რომ სანდოობის ხარისხი მაღალი იყოს. ცვლილებების შედგენა 1 კვირაში შეიძლება, მაგრამ როცა გინდა, რომ ცვლილებებს თან ახლდეს მაღალი კონსენსუსი, ეს მარტივი პროცესი არ არის".

კახიანი მიიჩნევს, რომ კონსტიტუციაში ცვლილებების შეტანა აუცილებელია, რადგან ნაციონალური მოძრაობის ხელისუფლების დროს შეტანილმა ცვლილებებმა კითხვები დატოვა:

"ნაციონალური მოძრაობის მმართველობის დროს კონსტიტუცია 24-ჯერ შეიცვალა. კონსტიტუცია ისე იცვლებოდა, ამის შესახებ იურიდიული წრეებიც კი, პოსტ-ფაქტუმ ვიყავით ინფორმირებული. ჩვენს მიზანს ისეთი კონსტიტუციის შემუშავება უნდა წარმოადგენდეს, რომლის მიმართაც კითხვები აღარ იარსებებს. მუდმივი არაფერია, მაგრამ კონსტიტუციამ ათწლეულებს უნდა გაუძლოს"

კახიანის თქმით, მისთვის გაუგებარია, რატომ მიდის საუბარი საქართველოს პრეზიდენტს უფლებამოსილების შეწყვეტაზე:

"თუ პრეზიდენტის ადმინისტრაცია ასეთ საფრთხეებს ხედავს, შემიძლია ისინი დავამშვიდო და ვთქვა, რომ გამორიცხულია, საქართველოს პრეზიდენტს უფლებამოსილება შეუწყდეს. თუ საპრეზიდენტო ინსტიტუციას თეორიულად რაღაც ცვლილება შეეხება, ეს არა ამჟამინდელი პრეზიდენტის, არამედ მომდევნო პრეზიდენტის პირობებში მოხდება. შეუძლებელია ცვლილება კონკრეტულ პირებს შეეხოს. მე ინსტიტუციურ ცვლილებებზე ვსაუბრობ".

ნაციონალურ მოძრაობაში აცხადებენ, რომ ქართული ოცნება ყველაფერს აკეთებს იმისთვის, რომ დააკნინოს პრეზიდენტის ინსტიტუტი. შეგახსენებთ, რომ ქართულ ოცნებას ცესკოს წინასწარი მონაცემებით საკონსტიტუციო უმრავლესობა გარანტირებული აქვს.