ერთიანი ნაციონალური მოძრაობის ვაკის მაჟორიტარობის კანდიდატი ელენე ხოშტარია აცხადებს, რომ მიუხედავად უსამართლო ბრძოლისა, აღიარებს წაგებას და ის ამომრჩევლის ნებას პატივს ცემს.

მისი თქმით, მთავარი ამოცანების შესასრულებლად მუშაობას შემართებით განაგრძობს. პოლიტიკოსი აქცენტს აკეთებს იმ მიზეზების გარკვევის მნიშვნელობაზე, რის გამოც ამომრჩეველმა ენმ-ს ნდობა არ გამოუცხადა.

"დღეს ჩვენ განსაკუთრებული პასუხისმგებლობა გვაქვს, როგორც, სამწუხაროდ, ერთადერთ დარჩენილ ოპოზიციურ პარტიას.

მიუხედავად უსამართლო ქმედებებისა, მე ვაკე წავაგე, ნამდვილად წავაგე. მე დღეს ვაკემ ნდობა არ გამომიცხადა და მე ამ არჩევანს პატივს ვცემ".

საპარლამენტო არჩევნების მეორე ტურში ელენე ხოშტარიამ ვაკის საარჩევნო ოლქში ქართული ოცნების კანდიდატ ბიძინა გეგიძესთან 8 597 ხმით წააგო და ხმების 24,48% მიიღო. ის მეცხრე მოწვევის პარლამენტში პროპორციული სიით შევა.