"მრავალპარტიული პარლამენტი არ შედგა და გარკვეულწილად ეს იყო საზოგადოების დაკვეთა", - ესე აფასებს პრეზიდენტი, გიორგი მარგველაშვილი საპარლამენტო არჩევნების შედეგებს და განმარტავს, რომ პოლიტიკური მოღვაწეობა არჩევნებით კი არ მთავრდება, არამედ იწყება.

მარგველაშვილმა მოუწოდა ამომრჩეველს, ჩაერთოს სხვადასხვა დისკუსიაში, ხელისუფლების კონტროლსა და აქტუალურ პოლიტიკურ დიალოგში:

"მინდა მადლობა ვუთხრა ქართულ საზოგადოებას, რომლის აქტიურობის შედეგადაც ქართული დემოკრატიის ეს მნიშვნელოვანი ნაბიჯი იქნა გადადგმული. მინდა აღვნიშნო საერთაშორისო და ადგილობრივი სადამკვირვებლო მისიების როლი. თქვენი მოღვაწეობის შედეგად ჩვენ აღმოვაჩინეთ ხარვეზები, რომელთა აღმოფხვრაც და გათვალისწინებაც ძალიან მნიშვნელოვანია მზარდი ქართული დემოკრატიისთვის.

"მინდა მადლობა ვუთხრა მედიას, თქვენი აქტიურობით შესაძლებელი გახდა ამომრჩევლისთვის პრაქტიკულად ყველა პოლიტიკური ძალის პროგრამის შეხედულებათა გაცნობა და ამომრჩეველმა აქედან გამომდინარე გააკეთა არჩევანი.

"მინდა მივულოცო პარლამენტში მოხვედრილ ძალებს, ქართულ ოცნებას, ნაციონალურ მოძრაობას, პატრიოტთა ალიანსს ის, რომ ისინი გახდნენ პარლამენტის წევრები და ვუსურვო მათ წარმატებული მოღვაწეობა ქართულ პარლამენტში".

ცესკოს ინფორმაციით, ამ დროის მონაცემებით, 50 ოლქის, 2229 საარჩევნო უბნის შედეგები დათვლილია. ამ მომენტისთვის არსებული წინასწარი მონაცემებით, ქართული ოცნება 115 დეპუტატით საკონსტიტუციო უმრავლესობას აგროვებს.

ვრცლად პარლამენტში შესული დეპუტატების სიის ნახვა შეგიძლიათ აქ.