საქართველოს რესპუბლიკური პარტიის ლიდერი, დავით უსუფაშვილი თვლის, რომ არჩევნებში პარტიის დაბალი შედეგი რამდენიმე ფაქტორმა განაპირობა და მათ შორის ერთ-ერთი ბიძინა ივანიშვილია. ამის შესახებ უსუფაშვილმა ტელეკომპანია GDS-ის ეთერში დღეს ისაუბრა:

"ჩვენ სრულიად მიზანმიმართულად აღმოვჩნდით დასჯილნი ურჩობისთვის, იმიტომ, რომ არ გავიარეთ იმ რჩევის შესაბამისად, რაც ბატონმა ბიძინა ივანიშვილმა მოგვცა პარტიასაც და მეც პირადად. ამ რჩევის არ და ვერ შესრულებისთვის, ამ ურჩობისთვის ჩვენ დავისაჯეთ. ივანიშვილმა დაგვსაჯა. მთელი მისი სექტემბრის საჯარო კამპანია იყო აქეთკენ მიმართული. მეც იძულებული გავხდი საკითხების ნაწილზე მესაუბრა."

იმაზე, თუ რას გულისხმობს კონკრეტულად, უსუფაშვილმა თქვა, რომ საარჩვენო კამპანიის მსვლელობის გამო სიღრმეებში ჩასვლისგან თავს შეიკავებდა და ახალი პარლამენტის დაკომპლექტების შემდეგ სხვა თემებზეც ისაუბრებს.

უსუფაშვილმა 5 პროცენტიანი ბარიერის ვერ გადალახვის კიდევ 2 მიზეზი დაასახელა:

  1. "ჩვენ ამომრჩეველმა დაგვაკისრა კოალიციური პერიოდის განმავლობაში პასუხისმგებლობა სრულად. და არ და ვერ დაინახა ჩვენი დამსახურება იმავე კოალიციურ პერიოდში გაკეთებული საქმეების, რომლებიც ჩვენი მონაწილეობითაც კეთდებოდა. არ არის ჯერ-ჯერობით ეს კულტურა, რომელიც დასამკვიდრებელია, პოლიტიკურ წრეებშიც და საზოგადოებაშიც, რომ ჩვენი გადაწყვეტილება, რომ კოალიციური ვალდებულებები პირნათლად შეგვესრულებინა და არ შეგვეწყო ხელი უმრავლესობის დაშლისთვის ჯერ კიდევ 2 წლის წინ, როდესაც თავისუფალი დემოკრატები გავიდნენ, ან რამე სამთავრობო კრიზისებისთვის, ან რაიმე მოვლენებისთვის, რომელიც დააზარალებდა ქვეყანას, ეს დაინახა ამომრჩევლის ერთმა ნაწილმა, არ დაინახა დიდმა ნაწილმა.
  2. თავად რესპუბლიკურ პარტიას, მე პირადად, ჩემს კოლეგებს გვმართებს საკმაოდ სერიოზული გააზრება და გადააზრება იმისა, ვართ თუ არა ადეკვატური დღევანდელი საზოგადოების მოთხოვნების პოლიტიკაში. ჩვენ გვაქვს ძალიან საამაყო წარსული, გვაქვს სერიოზული მომავალი, მაგრამ აწმყოშიც უნდა ვიყოთ ადეკვატურნი."