თბილისის საქალაქო სასამართლომ დიდ დიღომში ბუნებრივი აირის აფეთქების საქმეზე სამსახურებრივი გულგრილობისთვის ბრალდებულ ყაზტრანსგაზ-თბილისის თანამშრომლებს 4-4 წლით პატიმრობა მიუსაჯა.

სასამართლოში წარდგენილი მტკიცებულებებით დადასტურდა, რომ 2019 წლის 16 იანვარს, დღის საათებში, თბილისში, ავთანდილის ქუჩის #8-ში მდებარე კორპუსის მცხოვრებლებმა, ბუნებრივი აირის შესაძლო გაჟონვის შესახებ არაერთი შეტყობინება დატოვეს შპს ყაზტრანსგაზ-თბილისის სწრაფი რეაგირების ცენტრში. შემთხვევის ადგილზე გამოცხადნენ სწრაფი რეაგირების ჯგუფის ოსტატი ვ.მ. და ამავე ჯგუფის ზეინკალი - თ.ტ. მათ კორპუსის მცხოვრებლებმა განუმარტეს პირველ სადარბაზოსა და ლიფტის შახტაში ბუნებრივი აირის ჭარბი რაოდენიბით არსებობის შესახებ.

ბრალდება უთითებს, რომ ყაზტრანსგაზის თანამშრომლებმა სრულად არ შეამოწმეს, როგორც მთლიანი სადარბაზო, ასევე, თითოეულ სართულზე არსებული ყველა საცხოვრებელი ბინა, ლიფტის შახტა და სათავსო. ასევე, მათ არ მიუღიათ რაიმე პრევენციული ზომა, შესაძლო ავარიის თავიდან ასაცილებლად.

სამართალდამცველებმა ყაზტრანსგაზის თანამშრომლები 2019 წლის 18 იანვარს სასამართლოს განჩინების საფუძველზე თბილისში დააკავეს. ორივეს ბრალდება სისხლის სამართლის კოდექსის 220¹-ე მუხლის მეორე ნაწილით (გულგრილობა) წარედგინათ და აღკვეთის ღონისძიების სახით პატიმრობა შეეფარდათ.

16 იანვარს, საღამოს 9 საათზე დიდ დიღომში, საცხოვრებელ კორპუსში აფეთქება მოხდა. შემთხვევის შედეგად 4 ადამიანი გარდაიცვალა და 6 დაშავდა. გარდაცვლილებს შორის ერთი 4 წლის ბავშვია.

მომხდარზე გამოძიება მშენებლობის ან ექსპლუატაციის დროს უსაფრთხოების წესების დარღვევის მუხლით დაიწყო.