90-იანი წლების ბავშვებს ეზოში თამაშთან ერთად კიდევ ერთი საინტერესო გასართობი გვქონდა - სერიალებს ვუყურებდით. მეორე დღეს კი ერთმანეთს აჟიტირებული ვუყვებოდით შინაარსს, მიუხედავად იმისა, რომ წინა დღის სერია ყველას ნანახი გვქონდა. განვიხილავდით ჩვენს საყვარელ პერსონაჟებს და ვვარაუდობდით, რა მოხდებოდა შემდეგ სერიებში.

ერთ-ერთი ასეთი სერიალი, სახელად ცისფერი ხე, ალფრედო გალინარესმა და Canal 13-მა გვაჩუქა.

ისტორია ჩვენს თანატოლებზე, სკოლის მოსწავლეებზე იყო, რომლებიც სხვადასხვა რასის, რელიგიური მრწამსისა და სოციალური ფენის მიუხედავად ერთმანეთთან მჭიდრო კავშირში იყვნენ სკოლაშიც და სამეზობლოშიც. ეს იყო კომედია, რომელშიც ხშირად ამოვიცნობდით საკუთარ თავს, ჩვენს მეგობრებსა თუ ოჯახის წევრებს. სერიალი ახსენებდა მაყურებელს, რომ მთავარია მეგობრობა, სიყვარული და ერთმანეთის პატივისცემა. არ არსებობს პრობლემა, რომელიც ერთიანი ძალისხმევით ვერ მოგვარდება.

ცისფერი ხე ეკრანზე ზუსტად 25 წლის წინ გამოვიდა. საინტერესოა, როგორ გამოიყურებიან და რას საქმიანობენ სერიალის მსახიობები დღეს.

გვიდო კაჩკა - დანიელ ფიგუეირო

გვიდო დღეს არგენტინაში ერთ-ერთი პოპულარული შოუმენია: ერთდროულად მიჰყავს რამდენიმე გადაცემა, მონაწილეობს ფილმებსა და სერიალებში და ამავე დროს ერთ-ერთი ყველაზე გავლენიანი კომპანიის, ენდემოლის პროდიუსერია. 1999 წელს ის მსახიობ ფლორენცია ბერტოტიზე დაქორწინდა და 2008 წელს მამაც გახდა, თუმცა წყვილი 2010 წელს განქორწინდა.

2011 წლიდან დღემდე გვიდო პოპულარული გეიმ შოუ ყველაფერი ან არაფერის წამყვანია.

ბელენ ბლანკო - ლუსიანა ფერნანდესი

ბელენ ბლანკო არგენტინაში დღეს ერთ-ერთი ყველაზე მოთხოვნადი მსახიობია. ის ამავდროულად რეჟისორის ამპლუასაც ირგებს და კინოში დამოუკიდებელ ნაბიჯებს დგამს. 2016 წელს ეკრანზე ბლანკოს გადაღებული ფილმი ბუნება გამოვა.

მსახიობი მონაწილეობას იღებდა ერთ-ერთ ყველაზე პოპულარულ და რეიტინგულ სერიალში მკვლელი ქალები.

ფაკუნდო ესპინოზა - ფედე

ფაკუნდო ესპინოზა როლების ნაკლებობას არ უჩივის, თუმცა მას არგენტინაში მუსიკოსის სახელით უფრო იცნობენ. ამჟამად მონაწილეობს სერიალში მდიდრებს ნებართვა არ სჭირდებათ.

ეუხენია ტულიჩი - მარინა

ეუხენია ტულიჩის კვალი არგენტინული ტელესივრციდან 2002 წლის შემდეგ ქრება. შეიძლება ითქვას, რომ მისი ყველაზე ცნობილი როლი ცისფერ ხეში განსახიერებული მარინას პერსონაჟია.

გილერმო სანტა კრუზი - პანჩო ფერნანდესი

გილერმო შეიძლება ცისფერი ხიდან არ გეცნობათ, მაგრამ აუცილებლად გაგახსენდებათ მისი როლი მეამბოხე სულებში, სადაც ის ნიკოლასის როლს ასრულებდა. გილერმო 2004 წლიდან 2012 წლამდე ჩინეთში ცხოვრობდა და სწავლობდა. ამჟამად ის ბუენოს აირესში ცხოვრობს, პროფესიით გარემოს დაცვის ინჟინერია და მუშაობს ადამიანების მიერ დაზიანებული რეგიონებისა და ტერიტორიების აღდგენაზე.

ვიქტორია ონეტი - ანჟელიკა

ვიქტორია აქტიურად ჩნდება ეკრანზე და ამავდროულად საკუთარი გადაცემა "თაობები" აქვს Canal 9-ზე, სადაც სხვადასხვა თაობის სტუმრები ფილმებზე საუბრობენ.

მატიას პუელესი - ხოსე

სამწუხაროდ უცნობია ამჟამად რას საქმიანობს მატიასი, შეიძლება დანამდვილებით ითქვას, რომ ცისფერი ხე მისი კარიერის ყველაზე წარმატებული პროექტია.

დიეგო ბოზოლო - მატიასი

ერთადერთი, რაც დიეგოს შესახებ იცის საზოგადოებამ, არის ის რომ ამჟამად ის ლეიკემიას ებრძვის. იმედია გამოჯანმრთელდება.

რა თქმა უნდა, ეს ცისფერი ხის სრული სამსახიობო ანსამბლი არ არის. სამწუხაროდ ბევრმა მსახიობმა ამ სერიალის შემდეგ მალევე შეწყვიტა კარიერა, მაგრამ ამას დიდი მნიშვნელობა არ აქვს. მთავარი ისაა, რომ ჩვენ ისინი არასდროს დაგვავიწყდება, რადგან ამ ჯადოსნური ბავშვების დახმარებით ჩვენი ბავშვობაც უფრო სახალისო და საინტერესო გახდა.