მედიის განვითარების ფონდის 2016 წლის ანგარიშის თანახმად, ტელევიზიებიდან ყველაზე მეტი ფასიანი პოლიტიკური რეკლამა იმედმა მიიღო, სადაც 1 მილიონი ღირებულების მომსახურება ქართულმა ოცნებამ შეისყიდა.

ანგარიშის მიხედვით, 8 ივნისიდან 30 აგვისტოს პერიოდში, პოლიტიკური სუბიექტების მიერ საარჩევნო კამპანიაზე გაწეული საერთო 8 813 597 ლარიდან 78% ქართულმა ოცნებამ დახარჯა, ყველაზე მეტი თანხა კი გარე რეკლამაზე დაიხარჯა.

MDF წერს, რომ ტელევიზიებიდან ქართულმა ოცნებამ მხოლოდ იმედზე განათავსა ფასიანი პოლიტიკური რეკლამა. ხოლო, ყველაზე მეტი სარეკლამო და საინფორმაციო მომსახურება ქართულმა ოცნებამ პალიტრა ჰოლდინგში შემავალ ონლაინ (221 479) და ბეჭდვითი გამოცემებისგან (73 955) შეისყიდა.

მედიის განვითარების ფონდი 2016 წლის ანგარიშს აქვეყნებს, რომელიც მედიის თავისუფლების მხრივ საქართველოში არსებულ მდგომარეობას მიმოიხილავს. ანგარიში 2016 წლის 1 იანვრიდან 23 სექტემბრის ჩათვლით პერიოდს მოიცავს.