მსახიობი ჯეისონ მამოა მაყურებელმა წლების წინ სერიალ მაშველების წყალობით გაიცნო, თუმცა მიუხედავად მისი მრავალფეროვანი და საინტერესო ფილმოგრაფიისა, უკვე წლებია ერთ პერსონაჟთან - ხალ დროგოსთან ასოცირდება HBO-ს სერიალიდან სამეფო კარის თამაშები.

მიუხედავად იმისა, რომ მამოას პერსონაჟი სერიალს პირველივე სეზონში გამოეთიშა, ის ფანების ერთ-ერთ საყვარელ პერსონაჟად რჩება და დოთრაკიელთა მმართველის შოუში დაბრუნების შესახებ ეჭვი ყოველთვის ჩნდებოდა. ახლახან კი, ჯეისონმა მაყურებელს ამის კიდევ ერთი მიზეზი მისცა.

მსახიობმა ინსტაგრამზე ჯონ სნოუს როლის შემსრულებელთან, კიტ ჰარინგტონთან ერთად გადაღებული ფოტო დადო წარწერით: ვულოცავ კიტს, მისით და მთელი გუნდით სუპერ ამაყი ვარ. ვულოცავ სამეფო კარის თამაშებს, საუკეთესოები ხართ. ერთი სული მაქვს, შემდეგი სეზონი როდის გამოვა. Aloha j. დაბრუნდა სამუშაოდ”.

არავინ იცის რას გულისხმობს მამოა ფრაზა - “სამუშაოდ დაბრუნებაში”, მაგრამ ასეა თუ ისეა, სერიალში მისი დაბრუნების შანსი, ალბათ, ჯერ კიდევ მაღალია. სამეფო კარის თამაშებში ხომ მკვდრეთით აღდგომა არავის უკვირს.