სასამართლომ შეთქმულების თეორიების მხარდამჭერს, ალექს ჯოუნსსა და მის მიერ შექმნილ ვებგვერდს, Infowars-ს, მეტ ფიურისთვის, რომელმაც პერსონაჟი და მიმი Pepe the Frog შექმნა, $15 000-ის გადახდა დააკისრა.

Pepe პირველად 2005 წელს, ფიურის კომიქსში, Boy's Club-ში გამოჩნდა. მწვანე ბაყაყის გამოსახულებამ MySpace-ზე დიდი პოპულარობა მოიპოვა და მალევე ის 4chan-ზეც გამოჩნდა. 2010 წელს კი მისი გამოყენება ალექს ჯოუნსმაც დაიწყო.

Infowars ცნობილი ბაყაყის ფოტოს შემცველ პოსტერებს დიდი ხნის განმავლობაში ყიდდა, ფიურიმ ვებგვერდს სასამართლოში უჩივლა, რადგან ჯოუნსი მის პერსონაჟს მისთვის მიუღებელ კონტექსტში იყენებდა, თანაც კომერციული მიზნებისთვის.

"საჩივრის მიზანი ალექს ჯოუნსის წინააღმდეგ ბრძოლა და ფულის შოვნა არ იყო. ჩვენი მიზანია, რომ პერსონაჟის გამოყენება სიძულვილის შემცველ ფოტოებსა და იდეებში შეწყდეს. ხოლო თუ ვინმე ფიქრობს, რომ სიძულვილის შემცველ პოსტერებში Pepe-ს გამოყენებით ფულს იშოვის, ცდება", — აცხადებს ფიურის ადვოკატი.

ეს პირველი შემთხვევა არაა, როდესაც ფიურის Pepe-ს დაცვა მოუწია. 2017 წელს მან თვითგამოქვეყნებულ საბავშვო წიგნს უჩივლა, რომელიც Pepe-ს რასისტურ, ისლამოფობურ და სიძულვილის შემცველ კონტექსტში იყენებდა. 2018 წელს ადვოკატების დახმარებით ფიურიმ Pepe-ს ფოტოები ნეონაცისტურ ვებგვერდს, Daily Stormer-საც წააშლევინა.

Infowars-ს ფიურის ადვოკატებმა მხოლოდ იმ თანხის დაბრუნება მოსთხოვეს, რომელიც ვებგვერდმა Pepe-ს შემცველი პოსტერების გაყიდვით გამოიმუშავა.

ფიური ადვოკატებთან ერთად აცხადებს, რომ ისინი პეპეს დაცვას მომავალშიც გააგრძელებენ.