შსს საქართველოს პრეზიდენტის სალომე ზურაბიშვილის ტვიტერზე ტრამპის პოსტის რეტვიტის შემთხვევას შეისწავლის. ამის შესახებ On.ge-ს ინფორმაცია შინაგან საქმეთა სამინისტროში დაუდასტურეს. უწყებაში განგვიმარტეს, რომ გამოძიება მაშინ დაიწყება, თუ დანაშაულის ნიშნები გამოიკვეთება.

შესაძლო კიბერთავდასხმაზე დღეს, საქართველოს პრეზიდენტის ადმინისტრაციის პრესსპიკერმა ხატია მოისწრაფიშვილმა მიანიშნა. მან თქვა, რომ პირველადი მოკვლევით ტრამპის რეტვიტზე შეცდომა სოციალური მედიის მენეჯერმა დაუშვა, თუმცა არც კიბერთავდასხმა გამორიცხა.

საქმე ეხება საქართველოს პრეზიდენტის ტვიტერის ოფიციალურ გვერდზე, აშშ-ს პრეზიდენტის განცხადების გაზიარებას, სადაც დონალდ ტრამპი კონკურენტს, პრეზიდენტობის კანდიდატ ჯო ბაიდენს "მძინარას" უწოდებს.

შესწორება: ნიუსის თავდაპირველ ვერსიაში ეწერა, რომ შსს-მ ამ საკითხზე მოკვლევა დაიწყო.