დამანგრეველი მიწისძვრის შემდეგ, შაკირა სამშობლოს — კოლუმბიას ეწვია.

ლათინურამერიკელმა პოპვარსკვლავმა ჩოკოს რეგიონში სკოლების აღსადგენად სხვადასხვა ფონდთან ერთად, $1 მილიონზე მეტი შეაგროვა. ეს სკოლები 10 აგვისტოს მომხდარი 7.4 მაგნიტუდის სიმძლავრის მიწისძვრის შედეგად დაზიანდა.

აშშ-ის გეოლოგიური სამსახურის (USGS) მონაცემებით, სტიქიამ, სავარაუდოდ, 10.5 მილიონი ადამიანი დააზარალა; მრავალსართულიანი შენობები და საცხოვრებელი სახლები ჩამოინგრა, მოსახლეობა კი ნანგრევებქვეშ მოყვა.

უამრავი მსხვერპლის გარდა, კატასტროფამ ჩოკოს სასკოლო ინფრასტრუქტურაც გაანადგურა. შაკირას განცხადებით, მიწისძვრის შედეგად 200-მდე სკოლა დაზიანდა, ხოლო 40 შენობა სრულად განადგურდა.

ფოტო: ABC7

შაკირას ბავშვთა საქველმოქმედო ფონდს — Fundación Pies Descalzos ჩოკოში მოღვაწეობის მრავალწლიანი ისტორია აქვს. მომღერალი კოლუმბიისთვის სახსრების მოსაზიდად Global Citizen-ის FIFA-ს განათლების ფონდთან და Live Nation-თან პარტნიორობდა. თითოეულმა ორგანიზაციამ კატასტროფისგან დაზიანებულთა დასახმარებლად $500 000 გაიღო. ლათინური ამერიკისა და კარიბის ზღვის აუზის განვითარების ბანკმა (CAF) დამატებით $250 000 დაამატა დახმარების ფონდს, რამაც საერთო თანხა $1.25 მილიონამდე გაზარდა.

17 აგვისტოს მომღერალი ჩოკოს დედაქალაქ კიბდოს ეწვია, რათა ზარალი პირადად შეეფასებინა და მიწისძვრის შედეგების განსახილველად მთავრობის წარმომადგენლებს შეხვედროდა.

ფოტო: Getty Images

ვიზიტისას შაკირამ განაცხადა, რომ ის ჩიკოს მთავარი სახელმწიფო უნივერსიტეტის — კიბდოს ტექნოლოგიური უნივერსიტეტის (Universidad Tecnológica de Quibdó) აღდგენით სამუშაოებს უხელმძღვანელებს.

ამ ბოლო დღეებში ვუყურებდი ჩემი ქვეყნის ტანჯვას, თუმცა ასევე ვხედავდი ადამიანების გაერთიანებას სოლიდარობით, რომელიც მუდამ გვახასიათებდა — აღნიშნა შაკირამ