გაფრთხილება სპოილერების შესახებ: არ წაიკითხოთ ეს სტატია, თუ სამეფო კარის თამაშების მერვე სეზონის მესამე სერია ჯერ არ გინახავთ. სერიოზულად, არც კი გაბედოთ.

ცოცხლებმა გაიმარჯვეს.

სამეფო კარის თამაშების ისტორიაში ყველაზე მასშტაბური ეპიზოდი არა მხოლოდ ვინტერფელის მცველების გამარჯვებით, არამედ ღამის მეფის განადგურებითაც დასრულდა. მომაკვდინებელი საფრთხე არიდებულია, თუმცა ფასდაუდებელი მსხვერპლის ფასად.

ეს, რა თქმა უნდა, არ ნიშნავს, რომ ამიერიდან დალხენილი ცხოვრება იწყება. ჯონ სნოუსა და დეინერისს თანამებრძოლებთან ერთად ყურადღების მიმართვა სამხრეთისკენ მოუწევთ.

ნახეთ კითხვები, რომლებზეც პასუხი ყველას აინტერესებს:

ვინ იქნება ჩრდილოეთის მმართველი, დეინერისი თუ ჯონი?

ახლა, როცა ბრძოლა დასრულდა, ჯონი და დეინერისი მმართველობის თემაზე საუბარს აუცილებლად მიუბრუნდებიან. დრაკონების დედას, როგორც იცით, ერთადერთი მიზანი აქვს: დაიბრუნოს რკინის ტახტი. ჯონს კი ძალაუფლების სურვილი სულაც არ წვავს, თუმცა მანაც და დაენერისმაც იციან, რომ ის ტახტის რეალური მემკვიდრეა. შესაძლოა ვივარაუდოთ, რომ ჯონი ტახტს საყვარელ ქალს დაუთმობს, თუმცა, ცხადია, რომ ჩრდილოეთი (კონკრეტულად კი, სანსა) ამის წინააღმდეგი იქნება.

ამ ეპიკური ბრძოლის შემდეგ აქვს თუ არა ჩრდილოეთს საკმარისი რესურსები სერსეისთან დასაპირისპირებლად?

სერსეის ჩანაფიქრი, თავი შორს დაეჭირა მკვდრებთან შეტაკებისგან, გამართლებული აღმოჩნდა. მის არმიას ერთი ადამიანიც კი არ დაჰკლებია. ჩრდილოეთი კი, რომელსაც აქამდე შთამბეჭდავი არსენალი ჰყავდა: დოტრაკიელები, ორი დრაკონი, უნაკლოები და ჩრდილოეთის მეომრები, ახლა საგრძნობლად დასუსტებულია. სერიალის თანაავტორმა დევიდ ბენიოფმა დაადასტურა, რომ მესამე სერიაში დოტრაკიელი ხალხის საბოლოო განადგურების თვითმხილველები გავხდით.

როგორც ჯეიმიმ აღნიშნა წინა ეპიზოდში, სერსეის ეურონ გრეიჯოის გემები და 20 000 ახალი მეომარი ჰყავს. ეს ყველაფერი კი - ლანისტერების ოქროს დამსახურებით.

ღამის მეფე ტარგარიენი იყო?

შესაძლოა, ამას ამიერიდან აღარავითარი მნიშვნელობა არ ჰქონდეს, მაგრამ ღამის მეფეს დრაკონის ცეცხლმა ვერაფერი დააკლო - ეს კი, დრაკონზე ამხედრებასთან ერთად, ის თვისებაა, რომელსაც მხოლოდ ტარგარიენები ფლობდნენ.

"ჩვენთვის მნიშვნელოვანი იყო, რომ რა გეგმაც არ უნდა ჰქონოდა ვინტერფელს, უბრალოდ არ გამოსულიყო, რადგან სხვანაირად მოსაწყენი იქნებოდა", - ახსნა შოუს პროდიუსერმა დბ ვაისმა სერიის გასვლის შემდეგ, - "არავითარი მიზეზი არ არსებობდა იმის დასაჯერებლად, რომ ღამის მეფეზე დრაკონის ცეცხლი იმოქმედებდა, ამაში ვერავინ იქნებოდა დარწმუნებული".

რატომ ჩაფლავდა გეგმა?

როგორც სერიალის შემქმნელები ხსნიან, იმიტომ, რომ დეინერისი შურისძიების სურვილმა შეიპყრო. მას შემდეგ, რაც პირველი შემტევი ხაზი განადგურდა, დრაკონების დედა საშინლად განრისხდა და ცაში აიჭრა, რომ ზომბები ცეცხლით დაემარცხებინა.

"დენიმ უბრალოდ ვერ გაუძლო იმის ყურებას, როგორ იხოცებოდნენ დოტრაკიელები. გეგმამ იმ წამიდან დაიწყო დაშლა, როგორც კი დედოფალი დრაკონზე ამხედრდა", - თქვა ვაისმა.

რა აუცილებელი იყო ფანების ფავორიტის, ლიანა მორმონტის მოკვლა?

ლიანა მორმონტი, რომელმაც სულ რამდენიმე წინადადებით მოასწრო მაყურებლებისთვის თავის შეყვარება, ჩანაფიქრის მიხედვით, მხოლოდ ერთ სცენაში უნდა გამოჩენილიყო, თუმცა მსახიობთან შეხვედრის შემდეგ პროდიუსერები მიხვდნენ, რომ "მას ასე მალე წასვლის უფლებას ვერ მისცემდნენ".

"ვიცოდით, რომ ყველა ვერ დაიმსახურებდა დიდ სიკვდილს, თუმცა თუ ლიანა მაინც უნდა მოგვეკლა, ეს აუცილებლად მნიშვნელოვანი სცენა უნდა ყოფილიყო", - ახსნა ვაისმა. ზომბ გოლიათთან შერკინება კი სწორედ ასეთი მომენტი აღმოჩნდა.

არის თუ არა დაპირებული პრინცი არია სტარკი?

ყინულისა და ცეცხლის სიმღერის მკითხველებმა აზორ აჰაის ლეგენდა კარგად იციან: ის კაცთა მოდგმის გადამრჩენელი და მელისანდრას არსებობის მთავარი მიზანია. თავდაპირველად წითელი ჯადოქარი ფიქრობდა, რომ აზორ აჰაი სტანის ბარათეონია, მერე - გენდრი, ამის შემდეგ კი - ჯონ სნოუ, თუმცა ვინტერფელში შებიჯებისთანავე მელისანდრამ არიას თვალი თვალში გაუყარა და მიხვდა, რომ ამჯერად აღარ შეცდებოდა.

და მერე მელისანდრა მოკვდა.. ანუ მისია შესრულებულია?

შოუს შემქმნელები ამბობენ, რომ ბოლო სამი წელი იცოდნენ, რომ არია დაასრულებდა გრძელ ღამეს. "ვცდილობდით, რომ ადვილად პროგნოზირებადი პასუხი, რომ ჯონ სნოუ არის გმირი და მხსნელი, თავიდან აგვერიდებინა", - ახსნა დევიდ ბენიოფმა.

ვინ დარჩა ცოცხალი?

სხვათა შორის, ბევრი ადამიანი :ხეზე დაკაკუნება: ეს ეპიზოდი "საუკეთესო სისხლისღვრად" იყო დაანონსებული, თუმცა, როგორც ჩანს, ყველაფერი ჯერ კიდევ წინაა.

ცოცხლები: ბრიენა ტარტი, ჰაუნდი, დეინერისი, არია სტარკი, ჯონ სნოუ, სანსა სტარკი, ბრენ სტარკი, ვარისი, ტირიონი, ჯეიმი, სემი - "ყველაზე იღბლიანი ბიჭი ვესტეროსში", გრეი ვორმი, გენდრი, დროგონი და რაეგალი.

მკვდრები: ჯორაჰ მორმონტი, ლიანა მორმონტი, თეონ გრეიჯოი, ედისონ (ედი)ტოლეტი, ბერიკ დონდარიონი და მელისანდრა.

დაუდგენელი: გილი და ტორმუნდი

სად არის მოჩვენება - სნოუს ოთხფეხა მეგობარი?

ცოცხალია! რა ვიცით? იმიტომ, რომ ის მომავალი სერიის ტიზერში ჩანს. თუმცა ნიმერიას გზა-კვალი ჯერაც გაურკვეველია. სავარაუდოდ, ის ისევ ტყეებში დაძრწის.