საქართველოს კვიპროსის რესპუბლიკის პრეზიდენტი ნიკოს ანასტასიადისი, მეუღლესთან და დელეგაციასთან ერთად, პირველი ოფიციალური ვიზიტით ეწვია.

ის უკვე შეხვდა საქართველოს პრეზიდენტს სალომე ზურაბიშვილს ავლაბრის რეზიდენციაში. პრეზიდენტები პირისპირ და გაფართოებულ ფორმატში გამართავენ შეხვედრებს, გააკეთებენ მედიისათვის ერთობლივ განცხადებებს და მონაწილეობას მიიღებენ ორმხრივ დოკუმენტებზე ხელმოწერის ცერემონიაში.

დაგეგმილია შეხვედრები საქართველოს პრემიერ-მინისტრ მამუკა ბახტაძესთან და პარლამენტის თავმჯდომარე ირაკლი კობახიძესთან.

ოფიციალური ვიზიტის ფარგლებში, კვიპროსის პრეზიდენტი ნიკოს ანასტასიადისი და მისი მეუღლე ანდრი ანასტასიადისი საქართველოს კათალიკოს პატრიარქს, ილია მეორეს შეხვდებიან.

დაგეგმილია ასევე საქართველო-კვიპროსის ბიზნესფორუმი, რომელშიც მონაწილეობას ბიზნესის წარმომადგენლებთან ერთად, საქართველოსა და კვიპროსის პრეზიდენტებიც მიიღებენ.

საქართველოს პრეზიდენტის ადმინისტრაციის უფროსის, ლაშა ჟვანიას განცხადებით, კვიპროსის პრეზიდენტის ვიზიტს თავისუფლად შეიძლება ვუწოდოთ ისტორიული, რადგან კვიპროსის სახელმწიფოს მეთაური საქართველოში პირველად ჩამოდის.

"შეხვედრებზე განხილული იქნება საერთაშორისო ორგანიზაციებში კოორდინირებული მუშაობის საკითხები. ჩვენ გვაქვს ტერიტორიული პრობლემები, სადაც გვჭირდება კვიპროსის მხარდაჭერა, როგორც ევროკავშირის, ასევე, გაეროს ფორმატში", — აღნიშნა ლაშა ჟვანიამ.