90-იანი წლების ერთ-ერთი საკულტო ფილმი მატრიცა, დღეს უკვე წარმოუდგენელია იმ სამსახიობო ანსამბლის გარეშე, რომელსაც კინოსურათში ვხვდებით.

კიანუ რივზმა, ლოურენს ფიშბორნმა და კერი-ენ მოსმა ნამდვილად მოახერხეს ამ ფილმისთვის კიდევ უფრო მეტი სიღრმე მიენიჭებინათ.

თუმცა, სანამ სამსახიობო ანსამბლი საბოლოოდ დამტკიცდებოდა, ნეოს როლზე კიანუ რივზამდე უამრავი მსახიობი განიხილებოდა. მათ შორის იყვნენ: უილ სმიტი, ჯონი დეპი, ბრედ პიტი, ველ კილმერი და სხვები.

ერთ-ერთ კანდიდატად განიხილებოდა ლეონარდო დიკაპრიოც, რომელმაც როლზე უარი მხოლოდ იმიტომ თქვა, რომ არ სურდა ტიტანიკის გამოსვლიდან ასე მალე კიდევ ერთ, ვიზუალურ ეფექტებზე აგებულ ფილმზე ემუშავა.

უილ სმიტმა კი მატრიცაში თამაშს Wild, Wild West-ში მონაწილეობის მიღება არჩია.

თუმცა, იყო კიდევ ერთი კანდიდატი და ის არც მეტი, არც ნაკლები, სანდრა ბულოკია.

ინფორმაცია ამის შესახებ პროდიუსერმა ლორენცო დი ბონავენტურამ კიდევ ერთხელ დაადასტურა.

"უამრავ ადამიანს შევთავაზეთ ეს როლი, შემდეგ კი ან ისინი ამბობდნენ უარს, ან ჩვენ. უკვე სასოწარკვეთილებაში ვვარდებოდით. ბოლოს სანდრა ბულოკთან მივედით და ვთხოვეთ, რომ ეს როლი ეთამაშა, ამისთვის მზად ვიყავით ნეოს ქალად გადაგვეკეთებინა. თანაც, სანდრასთან მუშაობის გამოცდილება უკვე მქონდა. საბოლოოდ, სანდრამ გვითხრა, რომ ამ ფილმში თავის თავს ვერ ხედავდა", - იხსენებს ბონავენტურა.

ეჭვიც არავის ეპარება, რომ ბულოკი ნეოს როლს იდეალურად შეასრულებდა. თუმცა იმ შემთხვევაში, თუ ის მატრიცაში ითამაშებდა, მონაწილეობას ვეღარ მიიღებდა მისი კარიერის ერთ-ერთ ყველაზე მნიშვნელოვან კინოსურათ მის კონგენიალურობაში. ასე რომ, თავად გადაწყვიტეთ, უღირდა თუ არა ოსკარის მფლობელ სანდრა ბულოკს ნეოს როლზე უარის თქმა.