გამოცემა პოლიტიკო საქართველოს პრეზიდენტის სალომე ზურაბიშვილის საფრანგეთში ვიზიტის შესახებ სტატიას აქვეყნებს.

გამოცემა წერს, რომ მაშინ როცა ემანუელ მაკრონმა არაერთხელ გაუსვა ხაზი ორ ქვეყანას შორის მეგობრობას, მან ასევე დაიცვა სტანდარტი, რათა თავიდან აეცილებინა რუსეთთან ურთიერთობის დაძაბვა. მან კიდევ ერთხელ დაადასტურა, რომ საფრანგეთი მხარს უჭერს საქართველოს ტერიტორიულ მთლიანობას და დამოუკიდებლობას, თუმცა არ უთქვამს, რომ საქართველოს ტერიტორიების 20%-ის ოკუპაცია რუსეთმა მოახდინა.

პოლიტიკო წერს, რომ მაკრონთან შეხვედრის შემდეგ სალომე ზურაბიშვილმა ხაზი გაუსვა საფრანგეთის მონაწილეობას ევროკავშირის სადამკვირვებლო მისიაში, რომელიც საოკუპაციო ხაზთან მონიტორინგს ახორციელებს.

"დღეს საფრანგეთი ძალიან ბევრს აკეთებს, რაც წარსულში წარმოუდგენელი იყო. მაკრონმა მკაფიოდ განაცხდა, რომ პარიზი საქართველოს მხარს უჭერს, რითიც შეუძლია", – განაცხადა სალომე ზურაბიშვილმა.

გამოცემა აღნიშნავს, რომ სალომე ზურაბიშვილს უნდა დააახლოვოს საქართველო ნატოსთან და ევროკავშირთან და იმედოვნებს, რომ ერთ დღეს ორივე ამ ორგანიზაციის წევრი გახდება. თუმცა რუსეთი იმუქრება სამხედრო მოქმედებების დაწყებით, თუ საქართველო ნატოში გაწევრიანდება.

პოლიტიკოს ცნობით, სალომე ზურაბიშვილის ისტორია მისი ქვეყნის მსგავსად რუსეთს უკავშირდება. გამოცემა ასევე მიმოიხილავს ზურაბიშვილის კარიერას და წერს, რომ მან რუსეთთან გამარჯვებას ჯერ კიდევ 2004 წელს მიაღწია, როცა რუსული ჯარი საქართველოს ტერიტორიიდან გაიყვანა.

"ჩვენ გვჭირდება პარტნიორობის მეტი ჩართულობა და თანამშრომლობა, როდესაც საქმე რუსეთთან დისკუსიას ეხება", – აცხადებს ზურაბიშვილი.

ზურაბიშვილი ასევე აცხადებს, რომ ის და მაკრონი შეთანხმდნენ, რომ რუსეთ-საფრანგეთის დიალოგის დროს საქართველოს აუცილებლად ახსენებენ, თუმცა "წარმატების გარანტიას დღეს ვერავინ იძლევა".

"არავის შეუძლია იფიქროს, რომ დღეს პუტინთან რაიმე ეფექტური იქნება", — აცხადებს საქართველოს პრეზიდენტი.

პოლიტიკოს შეფასებით, ემანუელ მაკრონმა მხარი დაუჭირა ზურაბიშვილის ხედვას და საფრანგეთ-საქართველოს ურთიერთობების ახალი გვერდიდან დაწყების შესახებ განაცხადა.