ბრიტანულმა მოდის სახლმა ბარბერიმ ჰუდის გამო, რომელზეც ყულფი იყო ჩამოკიდებული, ბოდიში მოიხადა. ბრენდმა მოდელი შემოდგომა/ზამთრის 2019 წლის კოლექციიდანაც ამოიღო.

"ძალიან ვწუხვართ, რომ ჩვენმა პროდუქციამ ადამიანებში უსიამოვნება გამოიწვია. იმის მიუხედავად, რომ დიზაინი მეზღვაურების თემით იყო შთაგონებული, მოდელი არამგრძნობიარე იყო და ჩვენ შეცდომა დავუშვით", - თქვა ბრენდის აღმასრულებელმა დირექტორმა მარიო გობეტიმ CNN-თან.

დიზაინერმა რიკარდო ტიშიმ ასევე თქვა, რომ დიზაინის თვითმკვლელობასთან ასოციაცია ბრენდის მიზანი არ ყოფილა, თუმცა ბოდიში მანაც მოიხადა და დასძინა:

"ეს ბარბერის ღირებულებებს არ გამოხატავს და ჩვენ ის კოლექციიდან ამოვიღეთ. ყველაფერს გავაკეთებ, რომ ეს აღარ განმეორდეს".

მოდის სახლი ინსტაგრამზე მოდელმა ლიზ კენედიმ გააკრიტიკა. ის ჩვენებაზე უნდა გამოსულიყო. მან თქვა, რომ დიზაინის საკამათო შინაარსზე თავისი მოსაზრება ჩვენებამდე გამოთქვა, თუმცა უთხრეს, რომ "წერილი დაეწერა" ან "წუხილი საკუთარ თავთან შეენახა". მან დასძინა, რომ კულისებში მყოფები დიზაინზე ხუმრობდნენ და ყულფი ჭერზეც ჩამოჰკიდეს.

კენედიმ სამოსის მოსარგები ოთახი დატოვა. მისი თქმით, სიტუაციამ წარსული გაახსენა, რომელშიც მისმა ოჯახის წევრმა თავი მოიკლა.

"სუიციდი მოდა არაა. ეს არც გლამურია, არც თანამედროვეობა და რადგან ეს ჩვენება ახალგაზრდებს და მათ თავისუფალ გამოხატვას ეძღვნება, ამ შანსს მეც გამოვიყენებ. არ მესმის, როგორ ვერ შენიშნა რიკარდო ტიშიმ ან ბარბერის ნებისმიერმა თანამშრომელმა, თუ რას გამოხატავდა ეს დიზაინი — კონკრეტულად კისერზე ჩამოკიდებული ყულფი. როგორ ჩათვალეთ, რომ ეს ნორმალური იყო? განსაკუთრებით მაშინ, როცა თვითმკვლელობის შემთხვევები მსოფლიოში ასეთი გავრცელებულია, ეს კოლექცია კი გოგოებსა და ახალგაზრდებს ეძღვნებათ", - დაწერა მან ინსტაგრამის ვრცელ პოსტში.

მოდელი დასძენს, რომ ჰუდზე თოკის საზღვაო სტილში ჩამოკიდება სხვანაირადაც შეიძლებოდა და მას ისეთი კვანძი არ ჰქონია, როგორსაც მეზღვაურები აკეთებენ:

"მრცხვენია, რომ ამ შოუს ნაწილი ვიყავი. ჩემი მიზანი დიზაინერის ან ბრენდის უპატივცემულობა არ ყოფილა, მაგრამ ვფიქრობ, რომ უნდა გამოვხატო, ის რაც მაღელვებს. ეს საკითხი კი ბევრად დიდია, ვიდრე მე ვარ. მოდა არ უნდა იყოს ბრმა და ეს არ უნდა გააკეთეოს პოპულარობისთვის".

როგორც ბარბერის დირექტორი ამბობს, მან მოდელს დაურეკა და ბოდიში პირადადაც მოუხადა.