ბათუმის საერთაშორისო საუნივერსიტეტო ჰოსპიტალში ამბობენ, რომ 75 წლის პაციენტი არ დაკარგულა და მან საავადმყოფოს ტერიტორია თვითნებურად დატოვა. პაციენტის დაკარგვის შესახებ ინფორმაცია თავდაპირველად TV 25-მა გაავრცელა.

როგორც ბათუმის საერთაშორისო ჰოსპიტალში On.ge-ს უთხრეს, პაციენტმა საავადმყოფოს ეზოში, სუფთა ჰაერზე გასვლა ითხოვა. ცოტა ხნის შემდეგ, როცა კაცი არ დაბრუნდა, დაცვამ საპატრულო პოლიცია გამოიძახა.

"[პაციენტი] ტუალეტში შევიდა და შემდეგ ითხოვა დაბლა ჩასვლა. ეს არის ჩვეულებრივი საავადმყოფო, სადაც არ გვაქვს უფლება, პაციენტს საავადმყოფოს ტერიტორიზე გადაადგილება შევუზღუდოთ ან ვუთხრათ, რომ არ გავიდნენ დერეფანში, როცა შეუძლია მას. ამ პიროვნებას შეეძლო გადაადგილება, ჩამოვიდა პირველ სართულზე და ჰაერზე გასვლა ითხოვა. დაცვას სთხოვა, გავიდა გარეთ და რამდენიმე წუთში რომ არ დაბრუნდა, დაცვამ ატეხა განგაში და გამოიძახა საპატრულო პოლიცია", — ამბობენ ჰოსპიტალში.

მათივე ინფორმაციით, კაცი საპატრულო პოლიციამ იპოვა და შვილებს შეატყობინა. ამ დროისთვის, ის კვლავ ჰოსპიტალში რჩება. კლინიკაში უარყოფენ ინფორმაციას, რომ პაციენტი ჟანგბადზე იყო მიერთებული. მათი მტკიცებით, კაცს გულის უკმარისობა აქვს.