ოსკარის რიგით 91-ე დაჯილდოების ცერემონიამდე სულ რამდენიმე დღე რჩება და დობლის თეატრში გასამართ შოუმდე მხოლოდ ოთხი რამ არის ცნობილი - ნომინანტებისა და წარმდგენების ვინაობა, ის, რომ შოუს წამყვანი არ ეყოლება და 40 ათასი ვარდი.

დიახ, არ მოგესმათ, 24 თებერვალს დოლბის თეატრი სწორედ ზემოთხსენებული რაოდენობის ცოცხალი ვარდებით მოირთვება და ასეთ გრანდიოზულ სცენაზე მიიღებენ ნანატრ ოქროს კაცს გამარჯვებულები.

ინფორმაცია ვარდების შესახებ ოსკარის სცენის დიზაინერმა დევიდ კორინსმა გაამხილა.

"ეს არის ერთ-ერთი მონახაზი იმ მრავალი დიზაინიდან, რომელსაც 91-ე ოსკარზე ნახავთ. უკვე ვთქვი, რომ სცენაზე 40 ათასი ცოცხალი ვარდი გვექნება?", - წერს კორინსი.

კინოაკადემიის 91-წლიან ისტორიაში მესამედ, ოსკარის დაჯილდოების ცერემონია წამყვანის გარეშე ჩაივლის.

ის, რომ ოსკარი წამყვანის გარეშე დარჩებოდა, მედიისთვის სიურპრიზი არ იყო, თუმცა ინფორმაცია ოფიციალურად ABC-ის გართობის ახალმა პრეზიდენტმა კერი ბურკმაც დაადასტურა.

2019 წლის ოსკარის წამყვანი მსახიობი და კომიკოსი კევინ ჰარტი უნდა ყოფილიყო, თუმცა, მას შემდეგ, რაც ის წლების წინ ტვიტერზე გამოქვეყნებული ჰომოფობიური განცხადებების გამო გააკრიტიკეს, ჰარტმა ცერემონიის წაყვანაზე უარი თქვა.

კინოსამყაროს ყველაზე დიდი მოვლენა 24 თებერვალს, ლოს-ანჯელესში, დოლბის თეატრში გაიმართება.