"ბავშვები თამაშობდნენ და დახტუნავდნენ ხიდზე", — ქუთაისში თეთრი ხიდის სავალი ნაწილის დაზიანების მიზეზებზე ქალაქის მერიის ზედამხედველობის სამსახურის უფროსმა, ზვიად ჯავახიამ მეგა ტვ-ის გადაცემა დისკურსში ისაუბრა.

მერიის წარმომადგენლის თქმით, მიუხედავად იმისა, რომ ხიდის მინის ნაწილი "ძალიან სქელი და ამტანია", იგი სკეიტბორდით ჩამოტეხეს. ზვიად ჯავახია ახალგაზრდებს, მოუწოდებს სკეიტ პარკში "იხტუნაონ" და არა მინებიან ხიდზე.

ჯავახიამ მადლობა გადაუხადა შინაგან საქმეთა სამინისტრომ გამოძიების ჩატარებისთვის და თქვა, რომ მისი ინფორმაციით დადგენილია ის პირი, ვინც ხიდი დააზიანა.

ქუთაისის თეთრი ხიდი ნოემბერში გაიხსნა, თუმცა უკვე რამდენჯერმე მოექცა მედიის ყურადღების ცენტრში. პირველად, როცა მოქალაქეებმა აღმოაჩინეს, რომ ტერენტი გრანელის ლექსის ავტორად კოლაუ ნადირაძე ეწერა და მეორედ, როცა ეს შეცდომა გადაფხეკით გამოასწორეს. გარდა ამისა, რადიო თავისუფლების ინფორმაციით, გახსნიდან მალევე დაზიანდა მინისა და ლითონის კონსტრუქციების გადაბმის ადგილები.