გიგა ლორთქიფანიძის სახელობის რუსთავის პროფესიულ-დრამატული თეატრში 20 და 21 დეკემბერს ჟან-ბატისტ მოლიერის, შედევრად აღიარებული პიესის, დონ ჟუანი ანუ ქვის სტუმარის, პრემიერა გაიმართება. სპექტაკლის რეჟისორი თეატრის სამხატვრო ხელმძღვანელი, სოსო ნემსაძეა.

ირეალურ სამყაროდან მოვლენილი ფსევდო გმირი მაღალი წრის თავხედი წარმომადგენელი პერსონაა, რომელიც ვერ მოიშორა სამყარომ, რადგან ის სულ მოთხოვნადია და საზოგადოებას მუდამ აოცებს.

რატომ არ ემორჩილება საზოგადოება იმ ცვლილებას, რომელსაც დონ ჟუანი ითხოვს? სად იკვეთება მისი პიროვნული, თუ ქმედითი შეცდომები? ვინ არის იგი? ყველაზე დიდი ნაძირალა, ცოფიანი ძაღლი, მწვალებელი, ველური მხეცი, თუ გაიძვერა მექალთანე? ალბათ უფრო ცინიკოსი და ამპარტავანი.

სპექტაკლში დონ ჟუანის როლს ორი მსახიობი, ნიკა ჩხაიძე შეასრულებს. სხვა პერსონაჟების ამპლუაში კი მოგვევლინებიან - სოსო ელიზბარაშვილი, სოფო ზერაგია, ლუკა ციხისთავი, არჩილ მაკალაშია, ანა შარვაძე, თეა შარვაშიძე, თეონა ხვედელიძე, ნათია მელაძე, ნათია არბოლიშვილი, ზურა ჯინჭარაძე, ზურაბ ჯინჭარაძე და ლაშა კანკავა.

ჟან-ბატისტ მოლიერის პიესების კომიკურმა სიდიადემ ტრაგიკულობის მასშტაბს მიაღწია და დღეს მისი პერსონაჟები დროის გარეშე ცოცხლობენ. დონ ჟუანი ითვლება მოლიერის ერთ-ერთ შედევრად, სადაც წარმოჩინდება სამი მარადიული თემა: სურვილი, სიკვდილი და ღმერთი.

პიესას საფუძვლად უდევს ლეგენდა მექალთანე ახალგაზრდა კაცის შესახებ, რომელიც თავის მხრივ, სავარაუდოა, რომ რეალურ ამბავს ემყარება. პიესაში მოლიერმა კიდევ უფრო გააღრმავა მთავარი გმირის ხასიათი, წარმოსახა იგი, როგორც მამაცი, მაგრამ სიამაყით მთვრალი სასტიკი ცინიკოსი, რომლისთვისაც ყველაფერი თამაშია.