სექსი დიდ ქალაქშის ყურებისას, ყველას მოსწონდა კერი ბრედშოუს ბინა, რომელიც ყველა მარტოხელა გოგოსა და მისი სამეგობროს თავშესაყრელად იდეალური ადგილი იქნებოდა.

თუმცა, სამანტა ჯონსის როლის შემსრულებლის, კიმ კეტრელის რეალური ბინის ნახვის შემდეგ, შესაძლოა ის თქვენი ახალი საოცნებო სახლი გახდეს ნიუ-იორკში.

ეს კეტრელის პირველი სახლია. მისი ყიდვისას მსახიობი თითქმის 50 წლის იყო. როგორც მან Architectural Digest-ს უთხრა, მანამდე საკუთარი სახლის ქონა მისთვის პრიორიტეტს არ წარმოადგენდა.

"სახლის მოწყობისას, შთაგონების მთავარი წყარო კლასიკური ჰოლივუდის გლამური იყო. ეს ნაზი ფერები ელეგანტურობის შეგრძნებას მიჩენს", - ამბობს ის.

კეტრელი დასძენს, რომ სახლის მოსაწყობად ნივთები და სუვენირები საფრანგეთში, იტალიასა და ავსტრიაში ძველმანების მაღაზიებში შეიძინა. მათ შორის შიშველი ქალის ნახატი, რომელიც სავარძლის თავზეა. ჟურნალისტის კითხვაზე, კეტრელი პასუხობს, რომ ნახატზე მისი სხეული არაა გამოსახული.

"როცა ამ ლამაზ ნივთებს ვუყურებ, ვრწმუნდები, რომ ისინი პოზიტიური მხრიდან გამოხატავენ ჩემს ცხოვრებას, იმას, რასაც მივაღწიე და საიდან მოვდივარ. ეს სახლი საკუთარი თავისთვის დიდი საჩუქარი იყო", - ამბობს კიმ კეტრელი.