ჩვენს ქვეყანაში მიმდინარე მოვლენებისთვის ფეხის აწყობა ყოველთვის მარტივი არაა. თუ თქვენც, უამრავი სხვა ადამიანივით ცდილობთ, მოვლენების ჯაჭვში ლოგიკის ხაზები იპოვოთ, ოღონდ ისე, რომ ამან თქვენი დღის უდიდესი ნაწილი არ წაიღოს, მაშინ კარგი ამბავი გვაქვს: ამიერიდან ეს პროცესი ოდნავ უფრო ადვილი და სახალისო გახდება.

დღეს, საღამოს 8 საათზე, ექსკლუზიურად ფეისბუქის მომხმარებლებისთვის მიშა მშვილდაძის ახალი იუმორისტულ-ანალიტიკური შოუს პირველი გადაცემა დაიდება, რომლის ყურებასაც ლაივში შეძლებთ [შეგიძლიათ, თადარიგი ახლავე დაიჭიროთ და Facebook გვერდი გამოიწეროთ]. შემდეგ გადაცემებს კი რუსთავი 2-ზე, ჩემი ცოლის დაქალების დასრულების შემდეგ იხილავთ.

გადაცემის აღწერაში ვკითხულობთ, რომ ის საქართველოში და სამყაროში სერიოზულობის დეფიციტის გამო შეიქმნა, თუმცა ამ ფრაზას ძალიან სერიოზულად არ უნდა მიუდგეთ. გარდა კვირის მთავარი სიახლეების მიმოხილვისა, ყოველ კვირას მიშა მშვილდაძე ერთ მთავარ თემაზეც ისაუბრებს, რომელსაც სხვადასხვა კუთხით დაგვანახებს.

პირველი გადაცემის თემა კი, ცხადია, საპრეზიდენტო არჩევნებია.

"ჩვენ ამ გადაცემას დავარქვით სერიოზული იუმორისტული გადაცემა, რადგან გვინდა, ყველა იმ მნიშვნელოვან ამბავს შევეხოთ, რომელიც ადამიანებს აინტერესებთ და რომელზეც უნდათ ლაპარაკი. მთავარი არაა მარტო მყვირალა ჰედლაინები. ბევრად საინტერესოა ის ამბები, რომლებიც ერთი ან რამდენიმე ნიუსიდან შეიძლება კარგად არ ჩანდეს, მაგალითად, კონკრეტული რეგულაციები, რაზეც ბევრი სფეროა მიბმული და რომელიც რეალურად შეგვიცვლის ყოველდღიურობას. გვინდა, რომ ასეთი კავშირები დავიჭიროთ და მაყურებელსაც ვაჩვენოთ", - ამბობს გადაცემის წამყვანი, მიშა მშვილდაძე, - "ეს არის გადაცემა მოქალაქეთა ფართო სპექტრისთვის, რომელშიც შედიან, ერთი მხრივ, ის ადამიანები, რომელთაც არ აქვთ იმდენი დრო, რომ ყოველდღე საინფორმაციო გადაცემას უყურებენ და, მეორე მხრივ, ყველა, ვისაც უყვარს რეალობისთვის ცოტა ირონიულად შეხედვა".

ასე რომ, ყოველ პარასკევს, სამუშაო კვირის დასრულების შემდეგ, შეგიძლიათ ცოტა ხნით შეისვენოთ და ძალიან სერიოზული სახეებით ჩაუსხდეთ იუმორისტულ გადაცემას "კვირაში ერთხელ მიშა მშვილდაძესთან".