2001 წელს სტივენ სოდერბერგმა, ჰოლივუდის ვარსკვლავური შემადგენლობით, წლის ერთ-ერთი მთავარი კინომოვლენა, ოუშენის თერთმეტი მეგობარი გადაიღო. როგორც მოსალოდნელი იყო, ბრედ პიტის, ჯულია რობერტსის, ჯორჯ კლუნისა და მეთ დეიმონის სახელები საკმარისი აღმოჩნდა, რომ ფილმს კინოთეატრებთან რიგი დაეყენებინა და ფინანსურადაც წარმატებული აღმოჩენილიყო. სწორედ ამიტომ, მსახიობები კიდევ ერთხელ გადაიქცნენ პროდიუსერებისთვის ფულის საჭრელ მანქანებად და 2004 წელს ეკრანებზე ოუშენის თორმეტი, ხოლო 2007 წელს ცამეტი მეგობარი გამოვიდა.


Warner Bros.-მა ოფიციალურად დაადასტურა, რომ მალე მაყურებელს საშუალება ექნება ნახოს ფილმი - ოუშენის რვა მეგობარი. ფილმი ამჯერადაც ვარსკვლავური იქნება, თუმცა ერთი განსხვავებით, აქ მთავარ როლებს ქალები შეასრულებენ. თანაც უბრალო კი არა, ჰოლივუდის ნამდვილი დივები - ქეით ბლანშეტი, სანდრა ბულოკი, ჰელენა ბონემ კარტერი, ენ ჰეთევეი და პოპ ვარსკვლავი რიანა.


ცნობილია ისიც, თუ როგორ გადანაწილდება როლები. მაგალითად, ორი ოსკარის მფლობელი ქეით ბლანშეტი ბრედ პიტის პერსონაჟს შეცვლის, ხოლოდ სანდრა ბულოკი ჯორჯ კლუნის ქალური ვერსია იქნება.

შეგვიძლია ვივარაუდოთ, რომ ფილმის კიდევ ერთი რიმეიქი ბლოკბასტერობისთვისაა განწირული.