ყველასათვის საყვარელი საკულტო ფილმის, Back To The Future, მსახიობები კინოსურათის გამოსვლიდან 33 წლის შემდეგ ისევ შეიკრიბნენ.

მაიკლ ჯი ფოქსი, კრისტოფერ ლოიდი, ლეა ტომფსონი და ტომას უილსონი ბოსტონში, Fan Expo-ს დაესწრნენ.

შეხვედრის ამსახველი ფოტო მსახიობმა ლეა ტომფსონმა ინსტაგრამზე გამოუქვეყნა:

ფილმის შემქმნელები რობერტ ზემეკისი და რობერტ გეილი არიან.

სიუჟეტის მიხედვით, მთავარი პერსონაჟი, მარტი მაკფლაი, რომლის როლსაც მაიკლ ჯეი ფოქსი ასრულებს და მეცნიერი ემეტ ბრაუნი (კრისტოფერ ლოიდი) დროში, წარსულსა და მომავალში მოგზაურობენ, რათა აღკვეთონ საკუთარი ცხოვრების განვითარებაში დაშვებული შეცდომები.

1985 წელს ფილმის პირველი ნაწილი საერთაშორისო ფენომენად იქცა, რასაც შემდგომში, 1989 და 1990 წლებში, მეორე და მესამე ფილმები მოჰყვა.

ფილმის თაყვანისმცემლები დიდი ხნის განმავლობაში ელოდნენ კიდევ ერთი სერიის გამოსვლას, თუმცა ეს იმედი რობერტ ზემეკისმა 2015 წელს საბოლოოდ გააქარწყლა, როდესაც ერთ-ერთ ინტერვიუში თქვა, რომ კიდევ ერთი ნაწილის გადაღება არ იგეგმება.

აღსანიშნავია ისიც, რომ სანამ საბოლოო სახეს მიიღებდა და გადაიღებდნენ, ფილმის სცენარი ორმოცჯერ შეიცვალა.