აშშ-ს შტატ არიზონაში საკმაოდ უცნაური შემთხვევა დაფიქსირდა. პოლიციელებმა ახალგაზრდა მშობლები დააკავეს, რომლებსაც ბრალად Pokemon Go-ს თამაშის გამო 2 წლის შვილის უყურადღებოდ მიტოვება ედებათ.

27 წლის ბრენტ და 25 წლის ბრიანი დეილები შვილის უყურადღებოდ მიტოვებისა და მის წინაშე დაკისრებული ვალდებულებების უგულებელყოფის ბრალდებით დააკავეს. დაკავების შემდეგ მათი შვილი ბავშვთა მზრუნველობის ადგილობრივ ცენტრში გადაიყვანეს.

„არსებობდა ეჭვი, რომ ეს ინტერაქტიული თამაში ადამიანების პერსონალურ ინფორმაციას უქმნიდა საფრთხეს, მაგრამ ვერასოდეს წარმოვიდგენდით თუ Pokemon Go-ს გამო მშობლები მცირეწლოვან შვილს უყურადღებოდ მიატოვებდნენ. ეს სრულიად წარმოუდგენელია“, აცხადებს ერთ-ერთი ოფიცერი.

პოლიციაში პირველი ზარი საღამოს თერთმეტის ნახევარზე შევიდა. დეილების ოჯახის მეზობელმა სამართალდამცველებს განუცხადა, რომ მეზობელი სახლის ეზოში ბავშვი სრულიად მარტო იყო. პოლიციელებს ადგილზე ატირებული და ისტერიკაში მყოფი მცირეწლოვანი ბიჭი დახვდათ, რომელსაც მხოლოდ მაისური და პამპერსი ეცვა. როგორც ერთ-ერთი პოლიციელი აღწერს, ბავშვი უკიდურესად დასვრილი და ოფლიანი იყო.

სახლი ღია იყო, თუმცა შინ არავინ დახვდათ. მას შემდეგ რაც, პოლიციელები დარწმუნდნენ, რომ ბავშვი ნამდვილად აქ ცხოვრობდა, მის მშობლებს დაურეკეს.

დარეკვისას ბრენტ დეილის, ბავშვის მამას, პოლიციელებმა უთხრეს, რომ მისი შვილი უპატრონოდ მიგდებული იპოვეს, რაზეც ბრენტმა „არაუშავსო“ უპასუხა.

როგორც მშობლები აცხადებენ, მათ ბავშვი დააძინეს და სათამაშოდ ისე წავიდნენ. ისინი სან ტენ ველის ქუჩებში მანქანით დასეირნობდნენ, პარკებში ჩერდებოდნენ და პოკემონებს აგროვებდნენ.

ორივე მშობელს ბრალად ორი მუხლი: ბავშვის საფრთხეში ჩაგდება და ბავშვის უგულვებელყოფა წარედგინებათ.