ინგლისურის მასწავლებელმა, ივონე მეისონმა, თავისი ცხოვრების 17 წელი მოსწავლეების ნაწერების გასწორებაში გაატარა. ის ახლა უკვე პენსიაზეა გასული, თუმცა, როგორც ჩანს, საყვარელი საქმე კარგად ახსოვს.

მან თეთრი სახლიდან წერილი მიიღო, რომელიც პრეზიდენტ დონალდ ტრამპის სახელით იყო დაწერილი. მეისონს წერილის წაკითხვის შემდეგ, საყვარელი პროფესია გაახსენდა, აიღო კალამი და ყვითელი მარკერი, შეცდომები გაასწორა და გამომგზავნს უკან დაუბრუნა.

"მივიღე წერილი ტრამპისგან, ხვალ უკან გავუგზავნი", - დაწერა მან ფეისბუქზე. პოსტი მალე გავირუსდა.

თეთრი სახლიდან სამხრეთ კაროლინელმა მასწავლებელმა წერილი მას შემდეგ მიიღო, რაც ფლორიდის სკოლაში მომხდარ სროლაზე საკუთარი პროტესტი გაუგზავნა აშშ-ს პრეზიდენტს.

"შუა კლასის მოსწავლეს რომ დაეწერა ასე, 6-იანს დავუწერდი, მაღალკლასელს კი, ამ შეცდომებისთვის, 5-ს. როცა მთავრობის უმაღლესი წევრებისგან იღებ წერილს, ელოდები, რომ გრამატიკულად სწორად მაინც იქნება დაწერილი", - ამბობს მასწავლებელი.

მასწავლებელი დასძენს, რომ შესაძლოა წერილი ტრამპის ნაცვლად, თეთრი სახლის თანამშრომელმა დაწერა. როგორც ცნობილია, ხანდახან ტრამპის ტვიტერს თეთრი სახლის თანამშრომლები იყენებენ და სპეციალურად უშვებენ გრამატიკულ შეცდომებს, რათა აშშ-ს პრეზიდენტის ნაწერს მაქსიმალურად მიამგვანონ.