მას შემდეგ, რაც ოსკარის მფლობელი ამერიკელი მსახიობი, მორგან ფრიმენი სექსუალურ შევიწროებაში 8 ქალმა დაადანაშაულა, მან საჯარო ბოდიში მოიხადა.

თუმცა დღეს მან ახალი განცხადება გაავრცელა, სადაც ამბობს, რომ მედია მას უსამართლოდ ექცევა და დასძენს, რომ იმ ადამიანების გვერდით არ უნდა განიხილონ, ვინც ქალებს ფიზიკურად დასხმიან თავს ან სამსახურის მიღების სანაცვლოდ, სექსს სთავაზობდა.

ფრიმენი ასევე ამბობს, რომ სექსუალური შევიწროება მისი განზრახვა არ ყოფილა და ქალებთან შესაძლო შეუფერებლად მოქცევას, ის უადგილო "იუმორისა" და "კომპლიმენტის" სახელით ამართლებს.

ფრიმენის წერილი სრულად:

განადგურებული ვარ, ჩემი ცხოვრების 80 წელს, თვალის დახამხამებაში, ძირი გამოაცალა მედიამ, ბოლოს გავრცელებული ამბებით.

თავდასხმისა და შევიწროების ყველა მსხვერპლს უნდა მოვუსმინოთ. ჩვენ გვჭირდება მათი მოსმენა. მაგრამ, არასწორია, სექსუალური თავდასხმების საშინელი ინციდენტების გათანაბრება უადგილო კომპლიმენტთან და იუმორთან.

მე ის ადამიანი ვარ, რომელსაც სურს, რომ მის გარშემო მყოფ ქალებსა და კაცებს თავი კარგად აგრძნობინოს. აქედან გამომდინარე, ხშირად ვცდილობდი მეხუმრა და კომპლიმენტი მეთქვა ქალებისთვის, რაც, ჩემი აზრით, სასიამოვნო უნდა ყოფილიყო.

აშკარაა, რომ ყოველთვის სწორად არ ვაკეთებდი ამას და სწორედ ამიტომ მოვუხადე ბოდიში ყველას, ვისაც ჩემდა უნებურად ვაწყენინე.

მაგრამ, ასევე, მინდა რომ ეს აშკარა იყოს: მე არ შემიქმნია საფრთხისშემცველი სამუშაო გარემო. მე არ დავსხმივარ ქალებს თავს. მე არ შემითავაზებია ვინმესთვის სამსახური სექსის სანაცვლოდ. ნებისმიერი მსგავსი ინფორმაცია ტყუილია.

CNN-თან ინტერვიუში რვა ქალმა დაადანაშაულა მორგან ფრიმენი სექსუალურ შევიწროებასა და შეუფერებელ საქციელში.

ერთ-ერთი ქალი, რომელიც ანონიმურობას ინარჩუნებს, ამბობს რომ 2015 წელს ფრიმენთან ერთად ფილმ Going In Style-ზე მუშაობისას შევიწროების მსხვერპლი გახდა. მისი თქმით, ფრიმენი მისი სურვილის წინააღმდეგ ეხებოდა. "კაბა წამომიწია და მითხრა - შევამოწმებ გაცვია თუ არა საცვლები", - იხსენებს დაზარალებული.

CNN-ის სხვა წყაროების ინფორმაციით, ფრიმენის შეუფერებელი ქცევა მხოლოდ ამ ფილმის გადაღებებზე არ გამოჩენილა. 2012 წელს, Now You See Me-ს გადაღებებზე გავლენიანი მსახიობი ქალებს ხშირად ესაუბრებოდა მათ სხეულზე. ერთ-ერთი მსახიობი ქალი ამბობს, რომ ისინი ცდილობდნენ დეკოლტე არ ჩაეცვათ იმისთვის, რომ ფრიმენის კომენტარები აერიდებინათ.

"ყველა, ვინც მიცნობს ან ჩემთან უმუშავია, იცის, რომ არ ვარ ის ადამიანი, ვინც შეგნებულად შეურაცხყოფს ან შეგნებულად აგრძნობინებს თავს ვინმეს ცუდად. ბოდიშს ვუხდი ყველას, ვინც არასასიამოვნოდ ან უპატივცემულოდ იგრძნო თავი - ეს არასდროს ყოფილა ჩემი განზრახვა", - ასე უპასუხა მსახიობმა პირველად ბრალდებებს.

ამავე თემაზე: