ორ საუკუნეზე მეტია, რაც შვედეთს სხვა ქვეყანასთან ომი არ ჰქონია, თუმცა ამ ფაქტს არ შეუჩერებია შვედეთის მთავრობა, ახლიდან გამოეცა ინფორმაციული პამფლეტი, რომელიც მოსახლეობას ურჩევს, როგორ უნდა გაუმკლავდნენ ჰიპოთეტურ კრიზისებს.

განახლებული ოცგვერდიანი პამფლეტი სახელად "თუ კრიზისი ან ომი დადგება", მკითხველს სთავაზობს სტრატეგიებს თუ, როგორ უნდა გაუმკლავდნენ: ციფრულ თავდასხმებს, ტერორიზმს, გლობალურ დათბობას, საჭმლის დეფიციტს, ცრუ ინფორმაციის გავრცელებას და ა.შ.

"როგორ მოიქცვით თუ თქვენი ყოველდღიური ცხოვრება უკუღმა დადგება?" - პამფლეტი ამ სიტყვებით იწყება.

ვინაიდან კრიზისის დროს მარაგები მალე ქრება, ბროშურა გთავაზობთ მოსამარაგებელი რესურსების სიას, რომელშიც შედის მინერალური წყალი, სველი ხელსახოცები და დაკონსერვებული ჰუმუსი. ბროშურა ასევე გვთავაზობს ინფორმაციას იმის შესახებ, თუ როგორ ვიპოვოთ ბუნკერები, რა უნდა ვქნათ, თუ აღარ იმუშავებს ტელეფონები, ბანკომატები ან ინტერნეტი, ან როგორ უნდა ამოვიცნოთ პროპაგანდა.

"იმის მიუხედავად, რომ შვედეთი სხვა ქვეყნებთან შედარებით გაცილებით უსაფრთხოა, ჩვენი დამოუკიდებლობისა და უსაფრთხოების გარანტები დღესაც არ არსებობს. თქვენი მზად ყოფნით, თქვენ დაეხმარებით თქვენს სახელმწიფოს არსებულ საფრთხეებთან გამკლავებაში." - წერია ბროშურაში.

ილუსტრირებული ინსტრუქცია ინტერნეტსივრცეში ორშაბათს გამოჩნდა და ქვეყნის 4.8 მილიონ ოჯახს ელექტრონულად გადაეგზავნა. 1961 წლის შემდეგ ეს პირველი კამპანიაა, რომელიც საფრთხეებთან დაკავშირებით საზოგადოებრივი ცნობიერების ამაღლებას ემსახურება.

ბრუშურა არ აკონკრეტებს შესაძლო თავდამსხმელის ვინაობას, თუმცა, შვედეთმა რუსეთს არაერთხელ დასდო ბრალი საჰაერო და საზღვაო ტერიტორიების გადაკვეთაში, რასაც ოფიციალური კრემლი უბრალო "რუსოფობიას" ეძახის.

შვედეთმა სამხედრო ხარჯები 2016 წელს გაზარდა. გასულ წელს მან შეიმუშავა სამხედრო გეგმა და ნატოში გაწევრიანებასაც განიხილავს. შესაძლო საფრთხის შემთხვევაში შვედეთის დაცვაში ყველა მოქალაქეს შეუძლია მიიღოს მონაწილეობა.

"თუ შვედეთს თავს დაესხმება რომელიმე ქვეყანა, ჩვენ არ დავნებდებით. ნებისმიერი ინფორმაცია, რომელიც გააჟღერებს წინააღმდეგობის გაწევის შეწყვეტას, ტყუილია" - წერია საინფორმაციო პამფლეტში.