ბავშვის ყოლა დედამიწაზეც კი არაა ყოველთვის სახალისო (მოიძიეთ: გულისრევა, ფეხების შეშუპება და მშობიარობის პროცესი).

პოლონეთში არსებული ინფორმაციული ტექნოლოგიებისა და მენეჯმენტის უნივერსიტეტის მკვლევარებმა ჟურნალ Future-ში ახალი სტატია გამოაქვეყნეს, რომლის თანახმადაც, მარსზე ბავშვის გაჩენა შეუძლებელი იქნება, თუ ჩვენს დნმ-ს არ შევცვლით.

პირველ რიგში, განვიხილოთ წითელ პლანეტაზე წარმატებული გამრავლებისათვის ორი ძირითადი დაბრკოლება: რადიაცია და მიკროგრავიტაცია.

მარსის ატმოსფერო იმდენად თხელია, რომ კოსმოსური რადიაცია მის ზედაპირზე მყოფ ნებისმიერ ადამიანს (ან ადამიანის ჩანასახს) სერიოზულ ზიანს აყენებს. ეს რადიაცია ადამიანებზე მოგზაურობის განმავლობაშიც იმოქმედებს, რამაც შეიძლება სერიოზული პრობლემები შეუქმნას მათი გამრავლების უნარს. "ცნობილია, რომ რადიაცია განსაკუთრებით აზარალებს რეპროდუქციული დანიშნულების უჯრედებს. სწორედ ესაა ასტრონომების ჯანმრთელობისათვის უმთავრეს ზიანად მიჩნეული" - წერენ მკვლევარები.

მარსამდე მგზავრობისა და მარსზე ყოფნის განმავლობაში მიკროგრავიტაციაც მნიშვნელოვანი პრობლემაა. ჩვენ უკვე ვიცით, რომ იგი ძვლის მასის დაქვეითებასა და თვალებსა და ხერხემლის ტვინში სითხის რაოდენობას ცვლას იწვევს.

ასევე კოსმოსური მგზავრობით გამოწვეული პოტენციური სამედიცინო პრობლემებია: იმუნური სისტემის დაქვეითება, ცვლილებები ნერვულ სისტემაში და სმენის დაკარგვა. ამ ყველაფრის გათვალისწინებით, ნამდვილად ვერ ვიტყვით რომ ადამიანი მარსზე ბავშვების "გამოსაჩეკად" იდეალურ ფორმაშია.

მაშინ რა უნდა ქნან ადამიანებმა, რომლებიც მარსზე იცხოვრებენ და ოჯახის შექმნა მოუნდებათ? მათ სავარაუდოდ საკუთარი დნმ-ს შეცვლა მოუწევთ, რითაც ცოტა უფრო ნაკლებად ადამიანურები გახდებიან.

მკვლევარები სტატიაში საუბრობენ CRISPR ტექნოლოგიის გამოყენებაზე იმისათვის, რომ ადამიანებმა გადალახონ მარსთან დაკავშირებული რეპროდუქციული პრობლემები. ამ ტექნოლოგიის გამოყენება თავისთავად გამოიწვევს "ჰომო საპიენსის" შეცვლასა და ადამიანის "ახალი სახეობის" შექმნას. ეს სრულიად ახალ ეთიკურ პრობლემებს აჩენს, რომლებთან გამკლავებისათვის საკმარისზე მეტი დრო გვაქვს.

ცხადია, მარსზე გამრავლების შესაძლებლობა ხვალვე არ დაგვიდგება. ამ ცვლილებებით გამოწვეული შედეგების კვლევისათვის საკმარისზე მეტი დრო გვაქვს და მკვლევარებიც სწორედ ამ გამოსავალს გვთავაზობენ.

მეცნიერების აზრით, შემცირებული გრავიტაციის გავლენის შესწავლა ქალისა და მამაკაცის რეპროდუქციულ უჯრედებზე, ორსულობასა და მშობიარობაზე ძალიან მნიშვნელოვანია. ჯერჯერობით კი, მარსის წარმატებით კოლონიზაციამდე დრო კიდევ გვაქვს. რა თქმა უნდა, კოსმოსში გამრავლებისთვის მზადება აუცილებლად მოგვიწევს, მაგრამ, პირველ რიგში, ხალხი მარსზე მშვიდობით უნდა ჩავიყვანოთ.