თურქეთის განათლების მინისტრმა განათლების სისტემაში დასაქმებული 15,200 ადამიანი სამსახურიდან გაათავისუფლა. ინფორმაციას AP ადგილობრივ მედიაზე დაყრდნობით ავრცელებს.

განათლების მინისტრის თქმით, გათავისუფლებულ ადამიანებს სავარაუდოდ სახელმწიფო გადატრიალების მცდელობასთან ჰქონდათ კავშირი. აღნიშნული გადაწყვეტილება მას შემდეგ მიიღეს, რაც თურქეთის პრემიერ მინისტრმა ბინალი ილდირიმმა ფეტულა გიულენის მხარდამჭერებისგან "ფესვებიანად" გაწმენდის პირობა დადო.

განათლების სამინისტროს განცხადებით, გათავისუფლებული თანამშრომლების წინააღმდეგ გამოძიება უკვე დაწყებულია.

გარდა ამისა, თურქეთის უმაღლესი განათლების კომიტეტმა სხვადასხვა უნივერსიტეტის 1500 დეკანის თანამდებობიდან გათავისუფლების ბრძანება გასცა.

სახელმწიფო გადატრიალების მცდელობის შემდეგ თურქეთის ხელისუფლებამ თანამდებობა დაახლოებით 6000 ადამიანს დაატოვებინა, მათ შორის პოლიციელებს, მოსამართლეებსა და ჯარისკაცებს.