Facebook-მა გასულ წელს განაცხადა, რომ საკუთარი სერიალების გადაღებას იწყებდა, რომლის თითო ეპიზოდშიც მინიმუმ $3 მილიონს ჩადებდა.

ახლახან კი ცნობილი გახდა, რომ ერთ-ერთ შოუს, რომელიც სოციალური ქსელის მომხმარებლებისთვის იქნება ხელმისაწვდომი, არც მეტი, არც ნაკლები კრიშტიანუ რონალდუ შექმნის.

ახალი სერიალი ფეხბურთზე იქნება და ოქროს ბურთის მფლობელი სპორტსმენი ამ შოუს აღმასრულებელი პროდიუსერი იქნება.

სერიალის სიუჟეტი ნიუ-იორკის გარეუბანის გოგოების ფეხბურთის გუნდზე იქნება. მთავარი აქცენტი კი იმაზე გაკეთდება, თუ როგორ აერთიანებს ეს სპორტი სამყაროს და რომ არც რასას, არც რელიგიას, არც ორიენტაციას და არც სხვა განმასხვავებელ ნიშნებს მნიშვნელობა არ აქვს. გარდა ამისა შოუში ნაჩვენები იქნება თინეიჯერების ცხოვრება, მეგობრობა, ურთიერთობა ოჯახის წევრებთან და ა.შ.

როგორც უკვე იცით, ფეისბუქი აპირებს, ამაზონისა და ნეტფლიქსის მსგავსი პლატფორმა შექმნას ვებ-სერიალებისათვის. 10 და 30-წუთიანი სერიალების გარდა, სრულმეტრაჟიან სერიალებსაც უნდა ველოდოთ.