ჩვენი დროის ერთ-ერთი ყველაზე ნიჭიერი მსახიობი, რობინ უილიამსი 2014 წლის 11 აგვისტოს კალიფორნიაში, საკუთარ სახლში გარდაცვლილი იპოვეს. გარდაცვალების მიზეზი თვითმკვლელობა იყო.

ამ ამბიდან 4 წლის შემდეგ მსახიობის ბიოგრაფიული წიგნი გამოვიდა, სადაც მისი სისუსტეების, ანტიდეპრესანტებზე დამოკიდებულებასა და ჯიმ კერის მიმართ მის შუღლზეა საუბარი.

წიგნის ავტორი დეივ ითზკოფია, რომელმაც წიგნში უილიამსის ცხოვრების აქამდე უცნობი დეტალები გაასაჯაროვა და კიდევ უფრო დაგვარწმუნა იმაში, რომ მსახიობის ცხოვრება ბევრად უფრო ტრაგიკული და დარდით სავსე იყო, ვიდრე ეს აქამდე ვიცოდით.

ბიოგრაფიაში დეტალურად არის განხილული მსახიობის ურთიერთობა თავის პირველი ცოლთან, ვალერია ველარდისთან და მიმოხილულია თუ რატომ ჰქონდათ მათ ერთმანეთთან დაძაბული ურთიერთობა.

მოთხრობილია რობინისა და მიშელ ტიშ კარტერის რომანტიკული ურთიერთობა, რომელმაც ვალერიასთან ურთიერთობა დაძაბა და საბოლოოდ მსახიობს $6,2 მილიონის გადახდაც მოუწია.

წიგნში მოყოლილია რობინის ისტორია 1989 წლიდან 2006 წლამდე, რომელიც მსახიობისთვის, შეიძლება ითქვას, რომ გარდამტეხი აღმოჩნდა. ამ პერიოდში მსახიობი მარშა გარსიაზე დაქორწინდა, თბილ და მოსიყვარულე ოჯახში პრობლემები მას შემდეგ გაჩნდა, რაც რობინმა ალკოჰოლისა და ნარკოტიკების მიღება დაიწყო, შემდეგ კი ორეგონის შტატში, გამოსასწორებელ ცენტრში აღმოჩნდა.

გარდა ამისა, წიგნის მკითხველი გაეცნობა ჯოშ ბელუშის საიდუმლოებით მოცული გარდაცვალების ამბებსაც. 1982 წელს, ბელუში 33 წლის ასაკში კოკაინის მიღების შემდეგ გარდაიცვალა და როგორც ცნობილია, იმ ღამით მასთან სწორედ რობინ უილიამსი იმყოფებოდა.

400-ზე მეტ გვერდიან წიგნში ერთ-ერთი ყველაზე საინტერესო ნაწილი რობინის ცხოვრების ის პერიოდია ასახული, როდესაც ის ჯიმ კერიზე ეჭვიანობდა და ფიქრობდა, რომ კერი მასზე ნიჭიერი მსახიობია, მათ შორის კი სერიოზული შუღლიც გაჩნდა. ამის ერთ-ერთი მიზეზი, კი კერის, როგორც წლის ერთ-ერთი ყველაზე მაღალანაზღაურებადი მსახიობის დასახელება გახდა.

1995 წელს ორივე მსახიობს $15 მილიონი გადაუხადეს, რობინს ჯუმანჯიში შესრულებული როლისთვის, კერის კი ეის ვენტურას განსახიერებისთვის. ამის შემდეგ ჯიმ კერის ანაზღაურება წლიდან წლამდე იზრდებოდა და ისტორიულ მაქსიმუმს 2000 წელს მიაღწია, მაშინ როდესაც რობინს ამ პერიოდიდან უფრო ნაკლებ ჰონორარებს სთავაზობდნენ.

დეივ ითზკოფის წიგნი დეტალურად მიჰყვება რობინის ცხოვრების ყველა დეტალს 1960-იანი წლებიდან, 2014 წლის 11 აგვისტოს ღამემდე.