საქართველოს პრეზიდენტის განკარგულებით, გადადგა აჭარის ავტონომიური რესპუბლიკის მთავრობა. პრეზიდენტმა სახელმწიფო რწმუნებულად აჭარაში ზურაბ პატარაძე დანიშნა.

მთავრობის ახალი შემადგენლობის დამტკიცებამდე, უფლებამოსილებას განახორციელებს სახელმწიფო რწმუნებული და მისი ადმინისტრაცია.

ადმინისტრაციის წევრებად, პრეზიდენტმა ლევან გორგილაძე, სულიკო თებიძე, რამაზ ბოლქვაძე და იოსებ აბულაძე დანიშნა:

"შესაბამისი წარდგინება აჭარის უმაღლეს საბჭოში გადაგზავნილია. კონსულტაციების შედეგად, მაქვს მტკიცე რწმენა იმისა, რომ აჭარის უმაღლესი საბჭო ახალ კანდიდატურას, უახლოეს მომავალში დაამტკიცებს".

პრეზიდენტის გადაწყვეტილება გააპროტესტა ოპოზიციამ. აჭარის უმაღლესი საბჭოს წევრმა ნაციონალური მოძრაობიდან, პეტრე ზამბახიძემ მედიასთან საუბრისას თქვა, რომ ფორმალური საფუძველი შექმნეს მთავრობის გადაყენებისთვის:

"რწმუნებულის დანიშვნის ორი შემთხვევაა, ამთ შორის ერთი, როცა უნდობლობას გამოუცხადებ აჭარის მთავრობას და გადაყენებული იქნება, მეორე შემთხვევა კი არის, როცა პრეზიდენტი გადააყენებს მთავრობას. შეიქმნა ფორმალური საფუძველი იმისა რომ მთავრობა გადაეყენებინათ და დაენიშნათ რწმუნებული, რაც არასწორია და არ შეუწყობს ხელს რეგიონის განვითარებას".