ფინანსთა სამინისტრომ ცენტრ პოინტის დამფუძნებლების მიერ გავრცელებულ ინფორმაციას იმასთან დაკავშირებით, რომ უწყებას კომპანიისთვის 20 მილიონი ლარი აქვს დასაბრუნებელი, მცდარი უწოდა და განმარტა, რომ ინფორმაცია შეიცავს არასრულყოფილ მონაცემებს, გამომდინარე იქიდან, რომ ცენტრ პოინტთან ურთიერთდამოკიდებული კომპანიების ჯამური საგადასახადო დავალიანება სახელმწიფოს მიმართ შეადგენს 61 მილიონ ლარს, მათ შორის, 2016 წლის 12 ივლისის მდგომარეობით:

"ცენტრ პოინტ ჯგუფის დავალიანება შეადგენს 29 398 541 ლარს, შპს მარიჯანის დავალიანება - 10 317 577 ლარს, შპს ცენტრ პოინტ სიტის დავალიანება - 2 311 595 ლარს, შპს დიდი დიღმის ოაზისის დავალიანება - 10 542 208 ლარს, სხვა დანარჩენი - 8 740 000 ლარი".

სამინისტრო აცხადებს, რომ კომპანიის დამფუძნებლები სარგებლობენ იმ გარემოებით, რომ საგადასახადო ორგანოს საგადასახადო კოდექსით არ აქვს უფლება გადასახადის გადამხდელის თანხმობის გარეშე, გაამჟღავნოს გადამხდელის შესახებ დამატებითი დეტალური ინფორმაცია, რადგან კანონმდებლობით, ის წარმოადგენს საგადასახადო საიდუმლოებას:

"ფინანსთა სამინისტრო მოუწოდებს ცენტრ პოინტის მფლობელებს, არ შეიყვანონ შეცდომაში მოსახლეობა. მიაწოდონ მათ ობიექტური ინფორმაცია კომპანიის ფინანსური მდგომარეობის შესახებ ან გასცენ წერილობითი თანხმობა, რათა საგადასახადო ორგანომ აღნიშნული ინფორმაცია გაასაჯაროოს".

ცენტრ პოინტის დამფუძნებლის, მაია რჩეულიშვლისა და მის შვილის, გუკა რჩეულიშვილის წინააღმდეგ პროკურატურამ სისხლისსამართლებრივი დევნა დაიწყო. გარდა ამისა, ცენტრ პოინტ აჭარის გაყიდვების მენეჯერი, სალომე ჩარკვიანი და ცენტრ პოინტის ბათუმის საინვესტიციო პროექტის ხელმძღვანელი ირაკლი მინდელი 10 ივლისს დააკავეს. სასამართლო ცენტრ პოინტის დამფუძნებლებს ჯგუფურად სხვისი ქონების გაფლანგვას ედავება. საქმე ათეულობით მილიონ ლარს ეხება.

მაია რჩეულიშვილისათვის პროკურატურაში ბრალის წარდგენის პარალელურად, საგამოძიებო უწყების შენობასთან ცენტრ პოინტისგან დაზარალებული მოქალაქეები აქციას მართავდნენ. კომპანიის დამფუძნებელმა, ვახტანგ რჩეულიშვილმა მათ განუცხადა, რომ ხელისუფლებას ცენტრ პოინტის დავალიანება აქვს და თუ ის მათ კუთვნილ თანხას დაუბრუნებს, კომპანია მზადაა უმოკლეს დროში დაასრულოს მშენებლობები.