"ეს ზურგჩანთა უფრო ღირებულია, ვიდრე ჩემი სიცოცხლე", - ამ ფორმით გამოხატა პროტესტი პარკლენდის სკოლის მოსწავლემ, რომელიც უსაფრთხოების წესების გამკაცრებას ეწინააღმდეგება.

მას შემდეგ, რაც პარკლენდის სკოლაში შეიარაღებულმა თავდამსხმელმა 17 ადამიანი მოკლა, სკოლის ადმინისტრაციის გადაწყვეტილებით, მოსწავლეებს გამჭვირვალე ზურგჩანთების და საიდენტიფიკაციო ბარათის ტარება დაევალათ. მოსწავლეები აცხადებენ, რომ მსგავსი ზომები კიდევ ერთი შეხსენებაა იმ ტრაგიკული მოვლენისა, რომელიც გამოაიარეს.

პროტესტის ნიშნად მათ ზურგჩანთებს ფასის იარლიყები დააკრეს, რომელზეც ღირებულება $1,05 წერია. ამ ჟესტით მათ პოლიტიკოსებს, მათ შორის ფლორიდის სენატორს, მარკო რუბიოს მიმართეს. მოსწავლეების თქმით, პოლიტიკოსები აშშ-ს იარაღის დაცვის ეროვნული ასოციაციისგან (NRA) ფინანსურ მოგებას იღებენ და ამას მოსწავლეების სიცოხლეზე მაღლა აყენებენ.

"ეს ძალიან რთულია. ახლა მეგობრების დანაკლისთან ერთად იმასაც უნდა შევეგუოთ, რომ ჩვენს პირად სივრცეში იჭრებიან. ჩემი სკოლა იყო ადგილი, სადაც ყველა კომფორტულად გრძნობდა თავს. ეს იყო სახლი, სახლიდან შორს. ახლა კი ის დანგრეულია", - განაცხადა სკოლის ერთ-ერთმა მოსწავლემ СNN-თან ინტერვიუში.

იარაღის შესყიდვის წესების გამკაცრების მოთხოვნით, აშშ-ს ქალაქებში მოსწავლეთა მასობრივი მსვლელობები გაიმართა.

ამავე თემაზე: 6-წუთიანი დუმილი - სკოლის მოსწავლის პროტესტი აშშ-ის იარაღის პოლიტიკას