საქართველოს პარლამენტის თავმჯდომარემ ჟენევაში, საპარლამენტთაშორისო კავშირის ასამბლეის სესიაზე სიტყვით გამოსვლისას, რუსულ აგრესიასა და ცხინვალის რეგიონში არჩილ ტატუნაშვილის მკვლელობაზე ისაუბრა.

ირაკლი კობახიძის განცხადებით, ბოლო 25 წლის განმავლობაში საქართველოს იმ 280 000 იძულებით გადაადგილებული პირის პრობლემების მოგვარება უხდება, ვინც საქართველოს ტერიტორიის ნაწილიდან -აფხაზეთიდან და ცხინვალის რეგიონიდან ეთნიკური წმენდის შედეგად გამოდევნეს.

"საქართველოს მთავრობა ამ ტერიტორიებს 90-იანი წლების დასწყისში აკონტროლებდა. ამ ტერიტორიების უკანონოდ, ძალისმიერი გზით ოკუპაცია რუსეთის ფედერაციის მხრიდან მოხდა. 2008 წელს რუსეთის სამხედრო აგრესიის შედეგად დევნილთა რიცხვი გაიზარდა და ოკუპირებულ ტერიტორიებზე ადამიანის უფლებების კუთხით მდგომარეობა გაუარესდა", - განაცხადა ირაკლი კობახიძემ.

მისი თქმით, ამჟამად რუსეთს საქართველოს ტერიტორიის 20% აქვს ოკუპირებული.

"რუსეთმა დაამყარა საოკუპაციო რეჟიმები აფხაზეთსა და ცხინვალის რეგიონში და ამ საოკუპაციო რეჟიმების გავლით უხეშად არღვევს ადამიანის უფლებებს. მათ შორის იტაცებს მშვიდობიან მოქალაქეებს და აწამებს. სულ ახლახან არჩილ ტატუნაშვილი წამებით მოკლეს ცხინვალის ციხეში", - განაცხადა ირაკლი კობახიძემ.

ჟენევაში ქართული დელეგაციის ვიზიტი დღეს დაიწყო.