ბავშვები რომ ძალიან კრეატიულები არიან, ამას კალიფორნიელი პატარა გოგოს ისტორიაც მოწმობს, რომელმაც ექვს საათში სამასი ყუთი ორცხობილა გაყიდა. ნებისმიერი დამწყები ბიზნესმენისთვის შესაშური იქნებოდა ასეთი მაჩვენებელი, მითუმეტეს ყოველგვარი დანახარჯისა და მარკეტინგული კამპანიის გარეშე.

სკაუტმა გოგონამ, რომლის სახელიც არ გასაჯაროებულა, სკაუტთა ორგანიზაციისგან დავალება მიიღო. მას უნდა მოეფიქრებინა რაიმე კრეატიული გზა და მაქსიმალურად ბევრი ორცხობილა გაეყიდა. შემოსული თანხა გოგონების სკაუტთა ორგანიზაციის განვითარებას უნდა მოხმარებოდა. დაგვეთანხმებით, რომ მისია საკმაოდ რთული შესასრულებელი იყო, თუმცა არა ამ პატარა სკაუტი გოგონასთვის.

გამჭრიახი გონების წყალობით, გოგონამ მოიფიქრა, რომ კანაფის მაღაზიასთან გაჩერებულიყო და კლიენტებს დალოდებოდა. შედეგად, ექვსი საათის განმავლობაში, სამასი ყუთი ორცხობილა გაყიდა და 1500$ შეაგროვა. თანხის უმეტესი ნაწილი კვლავ ორგანიზაციას დაუბრუნდება, რათა სამომავლო აქტივობები დაგეგმოს და განახორციელოს.

გოგონას მოფიქრებით კანაფის მაღაზიის ადმინისტრაციაც აღფრთოვანდა და მისთვის ხელის შესაწყობად, ინსტაგრამზეც კი დადეს პოსტი.

ამ ამბავს ინტერნეტში დიდი გამოხმაურება მოყვა. ადამიანების ნაწილი ამბობდა, რომ ბავშვისთვის ასეთ ადგილებში ორცხობილების გაყიდვა სახიფათო იყო, მეორე ნაწილი კი გოგონას კრეატიულობას უქებდა.

ამ ამბავში კიდევ ერთი უცნაურობა მოხდა. სკაუტთა ორგანიზაცია, რომლის წევრიც ეს გოგონაა, დიდი ხანია აქტიურობს მარიხუანის გაყიდვებისა და მომხმარებლების შესამცირებლად.