200-მა ბრიტანელმა და ირლანდიელმა მსახიობმა ქალმა, მათ შორის, ემა ტომპსონმა, კირა ნაიტლიმ, ჰელენა ბონემ კარტერმა, ქეით უინსლეტმა, სირშა რონანმა, სალი ჰოუკინსმა, ანეტ ბენინგმა, კლერ ფოიმ და ემა უოტსონმა, სამუშაო ადგილზე სექსუალური შევიწროების წინააღმდეგ ღია წერილს მოაწერა ხელი.

გარდა ამისა მსახიობებმა იმ საქველმოქმედო ფონდებს, რომლებიც ქალთა მიმართ ძალადობის აღმოსაფხვრელად მუშაობენ, თანხა გადაურიცხეს.

ჰარი პოტერის ვარსკვლავი, ემა უოტსონი ერთ-ერთი პირველი დონორია, რომელმაც გაერთიანებული სამეფოს თანასწორობის ფონდს თანხა გადაურიცხა. ფონდი კი აკადემიკოსი, აქტივისტი და ქველმოქმედი ქალების ჯგუფმა დააფუძნა, რომელთაც ზემოთხსენებულ წერილს მოაწერეს ხელი. ემა უოტსონმა 1 მილიონი ფუნტი სტერლინგი გადაურიცხა კამპანიას, რომელიც სექსუალური შევიწროების მსხვერპლებს ეხმარება.

მსახიობი ქალების ინიციატივას შეუერთდნენ ბრიტანელი მსახიობი კაცებიც, მათ შორის კოლინ ფერტი, ტომ ჰიდლსტონი, გარი ოდლმანი და სხვები.

18 თებერვალს, ლონდონში Bafta-ზე ქალები წითელ ხალიჩაზე შავებში გამოწყობილნი მივლენ, რითაც ჰოლივუდში დაფუძნებულ კამპანიას სექსუალური შევიწროების წინააღმდეგ, Time's up (დრო ამოიწურა) სოლიდარობას გამოუცხადებენ.

ღია წერილში ვკითხულობთ: "უახლოეს წარსულში ჩვენ ვცხოვრობდით მსოფლიოში, სადაც სექსუალური შევიწროება არაკომფორტული ხუმრობა იყო; ქალად ყოფნის უხერხული ნაწილი, რომელსაც გვერდს ვერ აუვლიდი... ამაზე ადამიანები არ ლაპარაკობდნენ. 2018 წელს, თითქოს გამოვიღვიძეთ მსოფლიოში, რომელიც მზადაა ცვლილებებისთვის."