საპარლამენტო უმრავლესობა სახალხო დამცველის კანდიდატად ნინო ლომჯარიას დაასახელებს. ირაკლი კობახიძის განცხადებით, უახლოეს დღეებში, პარლამენტში კანდიდატურას განიხილავენ და დაახლოებით ერთ კვირაში ახალი სახალხო დამცველი დამტკიცდება:

"გავითვალისწინეთ სხვადასხცვა ფაქტორი, მათ შორის, ჩვენი კონსულტაციები არასამთავრობო სექტორთან. ასევე, გავითვალისწინეთ გამოცდილება, კვალიფიკაცია, მიუკერძოებლობის კრიტერიუმი."

საქართველოს მოქმედ სახალხო დამცველს, უჩა ნანუაშვილს უფლებამოსილება 7 დეკემბერს ეწურება. ნინო ლომჯარია ერთ-ერთი იყო იმ ოთხი ადამიანიდან, რომელთა კანდიდატურაც არასამთავრობო ორგანიზაციებმა უმრავლესობას შესთავაზეს.

ნინო ლომჯარია იყო ISFED-ის აღმასრულებელი დირექტორი, რის შემდეგაც ამავე ორგანიზაციაში სხვა პოზიციაზე გააგრძელა მუშაობა. 2006 წელს მიღებული აქვს თსუ-ს მაგისტრის ხარისხი სამართალმცოდნეობაში, 2011 წელს კი - სენტ ლუისში ვაშინგტონის უნივერსიტეტის სამართლის მაგისტრის ხარისხი.

გარდა ამისა, 2015 წლიდან არის ევროპული საერთაშორისო სადამკვირვებლო ქსელის, ENEMO-ს გენერალური მდივანი. ამასთან, 2014 წლიდან ლომჯარია ევროპული სადამკვირვებლო ორგანიზაცია - EPDE-ს გამგეობის წევრიცაა.

სხვადასხვა წლებში ახალგაზრდა იურისტთა ასოციაციაში მუშაობდა. 2010 წელს იგი ვაშინგტონის უნივერსიტეტის სამართლის პროფესორის კვლევის ასისტენტის პოზიციას იკავებდა. ამასთან, ლომჯარია არის 15 კვლევის ავტორი არჩევნების მონიტორინგის, საჯარო ინფორმაციის ხელმისაწვდომობის, მედია გამჭვირვალობისა და ანტი კორუფციულ საკითხებზე.